Teuta po kalon një formë aspak të mirë në Superiore. Durrsakët numërojnë 6 ndeshje pa fitore. Vetëm 2 pikë të grumbulluara kanë bërë që Teuta ta shohë veten në vendin e fundit me 13 pikë.
Situata mund të ndryshojë, teksa vetëm 3 pikë i ndajnë nga vendi i shtatë. Diferencat janë të ngushta dhe Teuta ka 1 ndeshje të prapambetur për t’u luajtur.
Dy sfidat e radhës brenda 1 jave nuk janë aspak favorizuese. Dhe pse luhen në stadiumin “Niko Dovana”, durrsakët duhet të përballen me Partizanin 7 dhjetor (sfida e prapambetur e javës së parë) dhe Egnatian 11 dhjetor dy skuadra që ndajnë respektivisht vendin e parë dhe të dytë.
Për “djemtë e detit”, që lundrojnë në ujërat e akullta të renditjes prej disa javësh, fitorja në të paktën në 1 nga këto takime është një detyrë në misionin për të dalë nga kriza e thellë.
Durrrsakët kanë rezultuar si “mace e zezë” për rrogozhinasit në këto tri sezone, madje edhe në fazën e parë të këtij kampionati, kanë arritur të fitojnë me një gol të Realdo Filit dhe shpresojnë që kjo situatë të vazhdojë.
Mbetet për t’u parë, nëse do vijë kthesa, ndërsa Martini duhet të bëjë maksimumin me të tijtë për të ndryshuar diçka në fundin e këtij viti.
