Gjykata e Posaçme ka shtyrë për në datën 11 dhjetor seancën për kryebashkiakun e zgjedhur të bashkisë Himarë, Fredi Beleri i cili për të disatën herë radhazi ka kërkuar lejen e posaçme që të betohet para këshillit bashkiak për të marrë detyrën.
Përfaqësuesit e Drejtorisë së Burgjeve kanë argumentuar se një kërkesë e tillë duhet të rrëzohet sepse nuk bazohet në ligj. Ndërsa avokatët e Belerit shprehen se kjo e drejtë Belerit i është garantuar nga Kushtetuta.
“Ata presin që o të vdesë Beleri, o të vdesin ata, nuk e di. Betimi nuk mund të bëhet si tek Lana, siç i kanë bërë të tjerët”, u shpreh avokati i Belerit.
Vetë Beleri tha se ajo që nuk pengohet me ligj, lejohet.
“Ky është diskriminim politik. Ka vendime politike dhe pozicionime të kryeministrit përpara çdo seance. Nuk ndodh në asnjë shtet të botës që një humbës të vijoj të drejtojë. Kjo është një padrejtësi që duhet të marrë fund. Diçka që nuk pengohet me ligj, lejohet. Është parim kushtetues,” tha Beleri.
E pranishme në seancë ka qenë edhe ambasadorja e Greqisë në Shqipëri, Katerina Kamitisi.
