Gjykata Themelore në Prishtinë ka vendosur masën e sigurisë arrest me burg për 30 ditë ndaj tre personave të dyshuar për vrasjen e Liridona Ademajt.
Naim Murseli, Granit Plava dhe Kushtrim Kokalla janë të akuzuarit që do të qëndrojnë në paraburgim për një muaj, secili me akuza të ndryshme në bazë të rolit të tyre të dyshuar në krimin e rëndë.
Diskutimet rreth masës së paraburgimit u zhvilluan gjatë një seance të posaçme, ku mori pjesë edhe i dyshuari Murseli së bashku me avokatin e tij, Ahmet Ahmeti.
Në mbrojtjen e tij, Murseli mohoi akuzat. Ai theksoi se nuk ishte larguar nga vendi i ngjarjes dhe se ai vetë kishte qenë i rrezikuar.
“Unë nuk kam ikur nga vendi i ngjarjes, madje kam qenë vetë i rrezikuar dhe kam kërkuar ndihmë në të njëjtën kohë deri në ardhjen e policisë”, ka deklaruar ai.
Ndërsa avokati Ahmeti tha se klienti i tij se nuk ka qenë i përfshirë në aktin e vrasjes.
Në përpjekje për të shmangur paraburgimin, avokati Ahmeti kërkoi nga gjykata që të mos e aprovojë kërkesën e prokurorisë ose të caktojë një masë më të butë.
