Sekretari kryesor i Punëve të Jashtme të Kenias Korir Sing’oei ndau një postim në rrjetet sociale ku përshkruante se sa i privilegjuar ishte të takonte presidentin shqiptar Bajram Begaj në Dubai, në Emiratet e Bashkuara Arabe.
Sing’oei tha se ai priti Presidentin Begaj përpara një takimi me Presidentin William Ruto në margjinat e Konferencës së 28-të të Palëve (COP28) të Konventës Kuadër të Kombeve të Bashkuara për Ndryshimet Klimatike (UNFCCC) , e cila po zhvillohet në qytet.
“Kam privilegjin të pres SH.T. Bajram Begaj, President i Shqipërisë, përpara takimit të tij me Presidentin Ruto në Dubai”, shkroi Sekretari Kryesor në X, platforma e njohur më parë si Twitter, në orën 12:57.
Por fotoja që i kishte bashkangjitur postimit, e tregonte Korir Sing’oei duke i buzëqeshur Edi Ramës.
Gazetari, Mwangi Maina, replikoi postimin e tij duke shkruar: “Ky është Kryeministri i Shqipërisë Edi Rama, jo Presidenti Bajram Begaj”.
Sing’oei e fshiu postimin menjëherë dhe në orën 16:27 ai hodhi një tjetër postim që identifikonte saktë kryeministrin Rama.
“Kam privilegj të pres SH.T. Edi Rama, Kryeministër i Shqipërisë, përpara takimit të tij me Presidentin Ruto në Dubai në margjinat e COP28”, shkruan në postimin e ri.
