Gazetari Milaim Zeka hidhi akuza ndaj kolegut Blendi Fevziu dhe studiuesit Auron Tare se i kanë vjedhur filmime të luftës në Kosovës. Në një emision televiziv, Zeka u shpreh se incizime të tija janë përdorur në emisionin “Opinion” në dy puntata, ndërsa autorësia e tij nuk është përmendur.
Ai tha se ka komunikuar për këtë me Fevziun, por shtoi se këtij të fundit “nuk ia ndjeu”.
Zeka tregoi se është plagosur për të marrë pamjet e luftës, ndërsa Fevziun e quajti “të pafytyrë”.
“Të dhëmb në shpirt nëse Blendi Fevizu i bën dy emisione ekskluzive te Opinioni dhe del një matrapaz, një hajdut që i çon incizimet e mia të luftës dhe Blendi Fevziu nuk ma përmend as emrin. Thotë ishte brenda në Frontline një gazetar suedez me origjinë nga Kosova. Dhe këto incizime ja jep Auron Tares”, tha ai.
“Për ato incizime unë jam plagosur në datën 21 maj 1999. Krevati im është gjuajtur nga bomba 500 metra dhe mjeku që ka operuar në Kukës pa narkozë ka bërë libër ‘Duart e përgjakura’ dhe e përshkruan momentin kur më ka operuar, kur unë rikthehem në jetë. Dhe më pyet ‘a je i çmendur ti që ke lënë Stokholmin dhe je rikthyer në luftë’. Dhe unë i them: Po, i çmendur jam, sepse vetëm të çmendurit dashurojnë, martohen dhe kthehen në luftë”, shtoi ai.
I pyetur “a nuk keni pasur mundësi t’ia komunikoni zotit Fevziu”, Zeka u përgjigj:
“Unë në emisionin e parë e mora në telefon i thashë këto janë incizimet e mia. Dhe ai pa pikën e turpit as nuk ja ndeu për atë punë. Dhe në emisionin e dytë nuk e përmirësoi. Dikush mund të jetë gazetar shumë i madh si Blendi, por mund të jetë i pafytyrë edhe më madh”.
