Policia e Shtetit ka dalë me një komunikatë zyrtare në lidhje me arrestimin në Spanjë të 49-vjeçarit Ismail Zeneli alias Luan Sadria, i shpallur në kërkim nga SPAK në kuadër të operacionit “Dajlok” ku u lëshuan 11 urdhër-arreste dhe u godit një grup kriminal i trafikut të lëndëve narkotike pas deskriptimit të bisedave në aplikacionin “Sky ECC”, ku në krye të grupit dyshohet se qëndron Ervin Mata.
Uniformat blu bëjnë me dije se Ismail Zeneli (Luan Sadria) është kapur në Madrid, teksa Interpol Tirana vijon punën për ekstradimin e tij në vendin tonë. Ndaj tij, GJKKO ka caktuar masën e sigurisë “Arrest në burg” për veprat penale “Sigurimi i kushteve dhe mjeteve materiale për të kryer vrasje”, “Trafikimi i lëndëve narkotike”, “Grupi i strukturuar kriminal” dhe “Kryerja e veprave penale nga organizata kriminale apo grupi i strukturuar kriminal”.
Në bisedat në “Ske ECC”, Ismail Zeneli njihej me nofkat “Daja-Dajloki-Transporter”. Sipas SPAK, Ismail Zeneli kishte rolin e porositësit dhe financuesit për lëndët narkotike që porosisnin nga Amerika Latine.
Po ashtu, ai do të hakmerrej dhe për vrasjen e vëllait të tij, Xhem Krasniqi alias Guximtar Sadria, i vrarë në sytë e tij më 18 Maj të vitit 2013, në qytetin e Kentit në Angli. Për këtë ai kishte kërkuar vrasjen e dy vëllezërve Edmond dhe Albert Nela, krim të cilin e kishte marrë përsipër Bujar Gërmizi, i cili kishte kontaktuar Nuredin Dumanin për të kryer vrasjen.
Njoftimi:
Finalizohet një tjetër operacion i përbashkët me partnerët spanjollë, për kapjen e shtetasve të shpallur në kërkim ndërkombëtar.
Në kuadër të operacionit “Madridi”, u lokalizua dhe u arrestua në Madrid, për t’u ekstraduar në Shqipëri, një 49-vjeçar i akuzuar nga GjKKO-ja, për vepra penale kundër personit dhe në fushën e narkotikëve, të kryera në kuadër të grupit kriminal.
Si rezultat i sigurimit të inteligjencës policore, nga strukturat hetimore të Policisë së Shtetit dhe shkëmbimit të saj, në kohë reale, ndërmjet Interpol Tiranës dhe Interpol Madridit, Policia spanjolle organizoi dhe finalizoi operacionin policor të koduar “Madridi”.
Në kuadër të këtij opeacioni u lokalizua dhe u arrestua, me qëllim ekstradimin në Shqipëri, shtetasi I. Z. alias L. S., 49 vjeç.
Gjykata e Posaçme kundër Korrupsionit dhe Krimit të Organizuar, në nëntor të vitit 2023, ka caktuar masën e sigurisë “Arrest në burg” për këtë shtetas, për veprat penale “Sigurimi i kushteve dhe mjeteve materiale për të kryer vrasje”, “Trafikimi i lëndëve narkotike”, “Grupi i strukturuar kriminal” dhe “Kryerja e veprave penale nga organizata kriminale apo grupi i strukturuar kriminal”.
Interpol Tirana vijon punën për ekstradimin e shtetasit I. Z. alias L. S., në vendin tonë.
