Gjykata e Tiranës kaloi për gjykim dosjen ndaj ish-sekretarit të Përgjithshëm të Ministrisë së Financave, Arlind Gjokutaj dhe dy personave të tjerë.
Ish-sekretari i Financave, Gjokutaj do të përballet në gjykatë me akuzën e “shpërdorimit të detyrës”. Për të njëjtën çështje në tavolinën e të pandehurve do të ulen edhe përmbaruesi Alban Ruli dhe ish-pronari, Ilir Thana.
Për të akuzuarin e katërt të çështjes, ish-drejtorin juridik të Ministrisë së Financave, Fatmir Hoxhaj, gjykata pranoi kërkesën e prokurorisë për pushimin e çështjes pasi dyshimet ndaj tij nuk u provuan. I pandehuri Gjokutaj do të gjykohet i veçuar nga dy të bashkëpandehurit, pasi do t’i nënshtrohet një procesi të zakonshëm, ndërsa Rulie Thana gjykimit të shkurtuar.
Sipas Prokurorisë, ish-zyrtari Gjokutaj ka lejuar shpërblimin në 1,2 milionë euro nga buxheti i shtetit të Ilir Thanës, si ish-pronar, për një pronë shtetërore, që nuk i përkiste.
Kjo për faktin se ai ishte kompensuar një herë më parë për të njëjtën pronë, që i ishte kthyer shtetit. Referuar akteve, pas një rivlerësimi të pronës, Ministria e Financave i ka hapur rrugë kompensimit në shifrën 1.2 mln euro.
Deri në qershor të vitit të kaluar, për llogari të kësaj shumë ishin lëvruar 48.8mln nga buxheti i shtetit, ku 23 milionë ishin tërhequr nga Thana. Prokuroria thotë se zyrtarët e ministrisë ishin vënë në dijeni nga një memo se ish-pronari ishte shpërblyer një herë në vitin 2015.
Lexo edhe:
Pranga Arlind Gjokutaj/ Historia e pronës, nisi me burg në ’44, sërish burg në 2023
