Lufta mes Izraelit dhe Hamasit i ka marrë jetën edhe një shqiptaro palestinezi.
Një ditë përpara nisjes së armëpushimit, një predhë avioni në mes të ditës shkaktoi vdekjen e disa personave mes tyre edhe të Ibrahim Jaber i lindur në Tiranë mbajtës i një pasaporte shqiptare.
I vëllai Ahmedi që ka mbetur vetëm në Tiranë prej tre javësh nuk kishte asnjë informacion për Ibrahimin. Por tashmë e ka marrë lajmin e kobshëm të humbjes së vëllait 20 vjeçar.
“Babi ishte i sëmurë nga këmba. Ishte shumë keq. Vëllai iku të blinte ilaçin. Tha unë nuk do të rri të shikoj babin kështu të sëmurë të shtrir në krevat. Iku të blinte ilaçin dhe u zhduk. U ndërprenë lajme për të për pesë ditë pastaj filloi armë pushimi. Filluan njerëzit të pyesnin njëri tjetrin deri sa u mor vesh lajmi që ka humbur jetën. Unë tani sinqerisht mund t’ju them se nuk kam vlerë në këtë jetë se vëllai ishte ai që me jepte vlerën. Vetëm vëllai për Zotin. Neve plotësonim njëri tjetrin. Unë tani jam bosh se shpirti im ka humbur. Jo vetëm vëllai se me ishim tërë kohën bashkë.”
Në të tilla kushte me vëllanë që ia mori lufta Ahmed Jaber, zemrën e shpirtin e ka në Gaza me shpresën e një paqeje të afërt.
“Mezi po pres lufta e të ketë armëpushim. Të iki të takoj familjen. Mamin ta përqafoj. Të shkoj tek vëllai vëllait. Ti them mirupafshim të paktën. Nuk e përqafova dot para se ta varrosja. Kisha dëshirë ta varrosja unë por isha larg dhe kjo është shumë e vështirë.”
Ibrahimi së bashku me babanë palestinez Abdullain, nënën shqiptare Albinën dhe vëllanë Jacob, supozoheshin të ktheheshin në Shqipëri më 9 Tetor. Por mbetën të bllokuar në Gaza si pasojë e nisjes së luftës më 7 Tetor./Top Channel
