Një polic është përplasur nga një automjet pasditen e kësaj të enjteje, në Durrës. Ngjarja është regjistruar përpara Drejtorisë Vendore të Policisë në qytetin bregdetar. Raportohet se efektivi i policisë Maringlen Allka ka qenë duke kaluar mbi vijat e bardha për në anën tjetër të rrugës, kur është aksidentuar nga një automjet.
Efektivi u transportua në spital, ndërsa drejtuesi i automjetit u shoqërua.
“Rreth orës 18:35, në lagjen nr. 8, përpara ambienteve të Drejtorisë Vendore të Policisë Durrës, automjeti me drejtues shtetasin A. F., ka përplasur shtetasin M. A. punonjës policie në Komisariatin e Policisë Durrës, i cili ishte duke kaluar në vijat e bardha për këmbësorët”, njoftoi policia.
“Punonjësi i Policisë, shtetasi M. A. ndodhet në spital, në kujdesin e mjekëve, ndërkaq, drejtuesi i automjetit, shtetasi A. F. është shoqëruar në Komisariatin e Policisë Durrës, për veprime të mëtejshme Grupi hetimor ndodhet në vendngjarje dhe po punon për sqarimin e rrethanave të aksidentit”, shtuan të njëjtat burime.
