Çdo administratë publike në Bashkimin Evropian mund të ndalojë punonjësit të veshin simbole fetare në vendin e punës.
Vendimi erdhi nga Gjykata e Drejtësisë e BE-së dhe bazohej në një çështje të mëparshme të ngritur në Gjykatën e Punës ne Liezh të Belgjikës.
“Një rregull i brendshëm i një autoriteti lokal që ndalon në mënyrë të përgjithshme dhe të padiskriminuar veshjen në vendin e punës të rrobave me karakter fetar mund të justifikohet nga dëshira e autoritetit për të krijuar një ambient administrativ neutral, duke marrë parasysh kontekstin në të cilin operon”, tha Koen Lenaerts, president i Gjykatës Evropiane të Drejtësisë.
Sidoqoftë, presidenti i gjykatës sqaroi se edhe zgjedhja e entiteteve të tjera publike për të autorizuar mbajtjen e këtyre veshjeve është gjithashtu e justifikuar, duke theksuar se çdo shtet anëtar ka të drejtën e vlerësimit të llojit të neutralitetit që dëshiron të promovojë.
