Janë publikuar me video pamjet e turpshme të sherrit të regjistruar këtë fundjavë në ndeshjen mes Tiranës dhe Vllaznisë së femravë në kompleksin “Skënder Halili”.
Siç shihet dhe në video, fusha e blertë është kthyer në “arenë boksi” me vajzat që grushtohen dhe shkelmojnë njëra-tjetrën, teksa ka dhe persona që mundohen t’i ndajnë. Ndeshja është ndërprerë në minutën e ’22 të takimit pas akteve të dhunës, teksa dy skuadrat ndajnë vendin e parë me pikë të barabarta në kampionat.
Situata ka degjeneruar aq sa ekipet janë zhvendosur për shkak të ngjarjeve të dhunshme nga kompleksi “Skendër Halili” në komisariatin e policisë për denoncimet e rastit.
Tirana më herët bëri një deklaratë, duke akuzuar kuqeblutë se provokuan konfliktin, duke shkuar në zonën e pankinës së Tiranës.
“Në minutën e 22-të ndeshja është ndërprerë, pasi skuadra kundërshtare ka reaguar ndaj pankinës sonë, fillimisht duke sharë e duke fyer, e më pas duke kaluar edhe në dhunë fizike. Situata ka eskaluar, ku drejtuesit e Vllaznisë Femra, janë larguar nga pankina e tyre dhe kanë ardhur në pankinën e skuadrës së Tiranës dhe kanë nisur të shfaqin akte të tmerrshme dhune e të godasin stafin teknik, drejtuesit e klubit të Tiranës Femra si edhe futbollistet. Klubi i Vllaznisë Femra ka dhunuar barbarisht drejtoreshën e klubit të Tiranës, Edonisa Aliaj, portieren Delvina Dyrmishi dhe futbollisten Flondra Behrami.” – thuhej në reagimin e kryeqytetaseve.
Më pas, reagoi edhe Vllaznia ku pretendoi të kundërtën. Klubi shkodran ka akuzuar organizatorët për paaftësi organizative. Ata madje kanë pretenduar se ndaj tyre u ushtrua dhunë dhe se vajzat e tyre vetëm janë mbrojtur.
“Duke qenë të vendosur për të përmbushur të gjitha detyrimet që rrjedhin nga zbatimi I rregullores së aktivitetit dhe Kodit të Disiplinës Sportive, kemi përmbushur detyrimin për të raportuar pranë organeve kompetente të FSHF-së duke evidentuar me fakte dhe argument dështimin e plotë të organizatorëve të kësaj ndeshje për organizimin e saj sipas rregullave të përcaktuara qartë. Lojtaret e KFF Vllaznia dhe zyrtarët e saj të ndodhur në kushtet e mbrojtjes ekstreme dhe pa prezencën e forcave të rendit të cilat janë informuar nga trajneri I KFF Vllaznia, përballuan me dinjitet sulmin e paprecedent të organizatorëve të këtij takimi nëpërmjet personave civilë të future nga katër anët e fushës!|!!” – thuhej në reagimin e Vllaznisë.
Ngjarjet e ndodhura mes Tiranës dhe Vllaznisë së femravë në kompleksin “Skënder Halili”, janë të turpshme. Kjo sepse pritej një ditë e vërtetë feste në futboll, nga dy klubet që ndajnë vendin e parë pas fitoreve të marra.
Për ngjarjen, po heton Komisioni i Disiplinës. Në vazhdim pritet të bëhen të ditura dhe vendimet nga Komisioni i Disiplinës.
