Aktori i humorit Edmond Halili ka folur për ndarjen nga jeta të Mjeshtrit të Madh, Zef Deda.
Gjatë fjalës së tij në një prononcim për mediat nga homazhet për Zef Dedën në teatrin “Migjeni”, aktori shprehet i trishtuar që nuk arriti dot ta takonte për herë të fundit pasi kur shkoi në banesën e tij për vizitë ai sapo kishte ndërruar jetë.
“Unë e kam thënë edhe herë të tjera, ‘ka vdekur humori shqiptar’ për mua. Zef Deda ka qenë një mrekulli e humorit shqiptar. Është një humbje e madhe për qytetin e Shkodrës nuk diskutohet, por edhe për mbarë Shqipërinë, sepse Zef Deda nuk bën më nëna. Janë të rrallë aktorët si Zef Deda. Ishalla pas 15 vitesh po del ndonjë. Unë bëra atë shfaqjen që ju e dini ‘50 vjet në skenë’ dhe nuk kam pasur mundësi ato ditë, pasi kam qenë me prova, me gjëra dhe mbaroj shfaqja shkova në shtëpi dhe thashë të shpisë dua të iki sot, për dje. Dua të shkoj ta takoj Zefin me pi kafe sepse nuk e dija që ishte aq rëndë. Shkuam tek shtëpia dhe në kat të dytë doli një çun me çantë. I thash ‘hë mo, po ti’!? Jam infermier tha. Po ku ishe? Te Zefi. “Si është Zefi?” i thashë. Zefi tha ‘Mondi na la’. M’i ka këputur këmbët.
Ndër të tjera aktori tregon edhe bisedën me gruan e Mjeshtrit të Madh: Takova sot gruan e Zefit dhe më tha Mondi të ka pasur në gojë. ‘Si s’po vjen Mondi t’më takojë’. Atë fjalë më mirë mos t’ma kishte thënë se m’i ka këputur këmbët. Unë kam shkuar shumë mirë me Zefin. Unë e njoh Zefin para gjithë këtyre sepse kemi qenë në një lagje, jemi rit me Zefin. I paharruar qoftë kujtimi i tij.”- tha Halili.
