3 të rinj janë arrestuar nga policia e Tiranës, pasi janë kapur teksa po transportonin një thes që përbante 7.3 kilogramë kanabis.
Aksioni i koduar “Collaboration” u zhvillua nga efektivët e Vorës dhe ata të seksionit për Hetimin e Narkotikëve të DVP Tiranë, të mbështetura nga inteligjenca operative, për një rast të shpërndarjes së lëndëve narkotike, thanë burime zyrtare.
“Si rezultat i këtij operacioni, në Rrugën e Limuthit, u bë kapja dhe arrestimi në flagrancë i shtetasve G. P., 18 vjeç, I. K., 22 vjeç, të dy banues në Vorë, dhe A. K., 20 vjeç banues në Dibër, për veprën penale “Prodhimi dhe shitja e narkotikëve”. Gjatë ndërhyrjes nga shërbimet e Policisë, këta tre shtetas janë kapur në flagrancë duke transportuar, me këmbë, një thes brenda të cilit kishte lëndë të dyshuar narkotike kanabis, me peshë rreth 7 kg e 300 gramë. Lënda narkotike u sekuestrua në cilësinë e provës materiale. Gjatë kontrollit në banesën e shtetasit A. K., në Dibër, shërbimet e DVP Dibër, gjetën dhe sekuestruan 1 kg tjetër, me lëndë të dyshuar narkotike kanabis”, njoftoi policia.
Po punohet për identifikimin e shtetasve të tjerë të implikuar në këtë veprimtari kriminale, shtuan të njëjtat burime.
