Florian Sulejmani do të jetë kreu i ri i Agjencisë së Mbikëqyrjes Policore, duke zëvendësuar në këtë post, Ardi Veliun e dorëhequr.
Sulejmani është prezantuar këtë të premte me punonjësit e AMP-së, nga ministri i Brendshëm, Taulant Balla, i cili gjatë fjalës së tij theksoi se vetëpastrimin e Policisë së Shtetit e ka parim kryesor.
Sulejmani ka një eksperiencë rreth 18 vjeçare, teksa më herët ai ka qënë në AMP si drejtor në Vettingu, por u largua me urdhër të Veliut. Sulejmani është zgjedhur në mesin e 5 emrave, që kaluan në tjetër fazë pas aplikimeve prej 26 efektivëve në total.
Në mesin e 26 aplikimeve fillestare për kreun e AMP u veçuan 5 prej tyre: Indrit Hitaj, Florian Sulejmani, Ramadan Çaço, Xhavit Shala dhe Gentjan Shehaj. Mesa duket, emri më i përshtatshëm që Taulant Balla e ka parë të arsyeshme t’ia propozoj për këtë post Kryeministrit Rama ka qenë Florian Sulejmani.
Agjencia e Mbikëqyrjes Policore prej disa muajsh ka marrë në dorë vetting-un e drejtuesve të Policisë së Shtetit, ndërsa shumë shpejt pritet të bëhen publike vendimet e para
Rreth një muaj më parë Ardi Veliu dha dorëheqjen nga posti drejtues i Agjencisë së Mbikëqyrjes Policore. Ardi Veliu u emërua në krye të AMP-së në shtator të vitit 2022, pas lirimit nga detyra si zv.ministër i Infrastrukturës dhe Energjisë. Veliu më herët ka qenë edhe Drejtori i Përgjithshëm i Policisë së Shtetit.
