Kreu i PD-së, Sali Berisha komentoi në një konferencë me gazetarët pasditen e kësaj të marte, vendimin e Apelit të GJKKO që nuk ndryshoi masën e detyrim paraqitjes ndaj tij.
Nga selia blu, ai evidentoi një qëndrim të mbajtur në seancë nga prokurorja e çështjes së privatizimit të ish-kompleksit sportiv “Partizani”. Sipas tij, Enkeleda Millonai tha në gjykatë se “korrupsioni konsumohet dhe duke zbatuar ligjin”. Qëndrim ky, shtoi, që tregon se prokuroria po vepron me urdhër politik të kundërshtarit të tij politik, kryeministrit Edi Rama.
“Së pari, më duhet të them se nuk ka asnjë risi në vendimet, të cilat dëshmojnë kontrollin e plotë dhe total të sistemit të drejtësisë, shndërrimin e saj në degë ekzekutivi nga narkodiktatura dhe Edi Rama. Unë dua t’u informoj ju se dje në sallën e gjyqit, famozja për lidhjet obskure me Taulant Ballën, ka deklaruar sa vijon: Sipas saj, korrupsioni konsumohet edhe duke zbatuar ligjin. Nuk ka standard më amoral sesa ky. Dhe është e regjistruar kjo”, theksoi Berisha.
Kryedemokrati u shpreh më tej se prokuroria Millonai ka lidhje “të errëta” me ministrin e Brendshëm, Taulant Balla.
“Kur një njeri i ligjit, deklaron se mosshkelja e ligjit, pra korrupsioni konsumohet duke zbatuar ligjin, ajo fshin çdo kufi midis moralit dhe amoralitetit, midis ndershmërisë dhe vjedhjes, midis zyrtares dhe banditizmit. Ajo bëhet në sallën e gjyqit ashtu siç është. Njeri që nuk njeh normë, ligj apo moral, përveç lidhjeve të saj obskure me një kriminel me kravatë, siç është Taulant Balla. Një deklaratë të tillë nuk e gjeni dot të bërë as në gjyqet më të egra të diktaturave. Pse? Sepse diktatura kishte bërë ligje mizore, të egra. Në emër të atyre ligjeve, njerëzit pushkatoheshin, vriteshin. Kurse për Millonain e lidhjeve obskure me Taulant Ballën, konsumohet korrupsioni duke respektuar ligjet. Ka deklaratë më perverse, më të turpshme, më kriminale se kjo? Nuk kisha dëgjuar kurrë. Nëse ka një garanci transparenca, një garanci mosabuzimi, një garanci mbrojtja, është zbatimi i ligjit. Kurse ajo që ka kaluar në fushën e Taulant Bego Yaris dhe moralti të tij, shumëzon me zero ligjin. Ajo e ka shqipëruar dje dhe është në audio në Gjykatën e Apelit kjo”, tha ai.
Akuza hodhi dhe ndaj prokurorit tjetër të SPAK, Arben Kraja.
“Por atë e ka shkruar Edi Rama me larot e tij, ish-oficerin e Sigurimit famëzi të Shtetit, Arben Kraja. I cili qëndron në detyrë në kundërshtim me ligjin aktual të prokurorisë. Dhe mendon se do zgjasë nën sqetullat e Edi Ramës, duke u përdorur si zagar i tij. Sepse ligji aktual i prokurorisë nuk lejon që oficerët e sigurimit të jenë në prokurori më. Ligji aktual i prokurorisë. Arben Kraja ka dalë prej sistemit të drejtësisë për shkak të ligjit të lustracionit nga Sali Berisha. Dhe tani nuk mund të jetë sepse edhe në ligjin e ri, në përputhje me nenin 6 të Kushtetutës, nuk mund të jetë. E kuptoni se këtë që ka shprehur Millonai, i lidhjeve më obskure e një kriminel që është dëshmuar i implikuar në vrasje, Taulant Balla, e shpreh në sallën e gjyqit me guxim, se korrupsioni konsumohet edhe me zbatimin e ligjit”, deklaroi.
“Irena Gjoka fshihet pas mbiemrit të burrit”
Ai u ndal edhe te ankimi që është bërë në gjykatë për përjashtimin nga çështja të gjykatëses Irena Gjoka. Sipas tij, ajo ka dhënë një masë antikushtetuese për të, pasi është anashkaluar institucioni i Kuvendit në proces.
Berisha ka kërkuar përjashtimin e Gjokës duke argumentuar se ajo ndodhet në kushtet e konfliktit të interesit. Kjo pasi sipas Berishës, në 1996, kur kryedemokrati ishte kryetar i Këshillit të Lartë të Drejtësisë, ka shkarkuar gjyqtaren Irena Gjoka nga sistemi pas akuzave për korrupsion.
Në konferencën e sotme, kreu i PD tha se Gjoka ka dhënë një deklaratë të gënjeshtërt në Ministrinë e Drejtësisë se nuk është ajo prokurorja e shkarkuar nga Berisha. Shkarkimin, sipas tij tentoi, tentoi ta fshehë duke përdorur ndryshimin e mbiemrit pas martesës.
“E morët vesh ju? Gjykatësja që fshihet prapa emrit të burrit, jam Gjoka, nuk jam Maneku. Po, u gjet dhe data. U gjet se ajo është ndëshkuar nga Këshilli i Drejtësisë. Ditën e shtunë e paraqita shkresën. Ministria e Drejtësisë e ka pranuar se ndaj saj në vitin 1996 është marrë masë disiplinore shkarkimi. E ka thirrur Ministria e Drejtësisë, ajo ka thënë nuk jam unë, se unë jam Gjoka, nuk jam Maneku. E kuptoni se mbrapa kujt fshihet Edi Rama? Po kjo është e paimagjinueshme. Pra, është gjetur, është marrë masa, e ka kryer krimin sepse nuk duhej të gjykonte, duhej të shkruante se nuk mund të gjykoj këtë çështje sepse jam e shkarkuar direkt prej tij në vitin 1996. Dhe tani që e gjeti Ministria e Drejtësisë dhe ia dha avokatit, më thonë se i ka thënë Ministrisë së Drejtësisë se unë jam Gjoka. Imagjinoni tani nëse një burrë ndërron mbiemrin sipas gruas, po mori dy gra, merr tre mbiemra dhe hajde gjeje kush është ai. Po kjo ndodh vetëm në shtetin e dordolecit, nuk ndodh në një shtet tjetër. Ja, ky është procesi. Ndaj dhe nuk kam asnjë lidhje me vendimet që shkelin Kushtetutën e vendit”, tha kryedemokrati.
Ai përsëriti se është i gatshëm të votojë kërkesën për masë sigurie ndaj tij nëse shkon në parlament.
“Po, e kam thënë të dërgojë kërkesën në parlament dhe unë e votoj. Unë e votoj, vota ime është që Sali Berisha, në përputhje me kërkesën e bërë, të shkojë të paraqitet për t’u marrë në pyetje”, tha Berisha.
“Malltezi i burgosur politik, kjo çështje do të zgjidhet në Strasburg”
Kreu i PD, tha se dhëndri i tij është i burgosur politik, ndërsa apeloi ankim të çështjes deri në Strasburg.
“Dhëndri im ishte i burgosur politik dhe është i burgosur politik. Dhëndri im ka marrë 410 metër katrorë si i 64-ti që ishte në atë fis, nga 1 miliard e 577 milionë metër katrorë të rikthyer pronarëve nga koha e diktaturës. E marrë e gjitha, në përputhje me dokumentet. Por për t’u marrë aty, duhet që dikush të përsërisë atë që thotë Edi Rama, se zbatimi i ligjit nuk përjashton konsumin e korrupsionit. E kuptoni se çfarë rreziku përbëjnë këta jo për Sali Berishën, as për familjen e tij, por për çdo qytetar dhe shoqërinë shqiptare. Kështu që nuk është e vërtetë që ka dhënë urdhër apo nuk ka dhënë urdhër. Ajo do shkonte në Strasburg menjëherë. E kam thënë dhe herën e parë këtu, që fatmirësisht Shqipëria është anëtare e Këshillit të Europës. Malltezi nuk u nxor nga burgu, ai u la në arrest shtëpie. Kjo nuk përbën asgjë. Ai nuk ka asnjë, ka zero, zero… ata vetëm nuk e kanë fajësuar. Vetë nuk kanë arritur ta fajësojnë. Pas tre vite hetime, nuk kanë arritur të gjejnë një provë, një fakt, një dokument për të ngritur padi ndaj tij, por e kanë marrë nën hetim. Pra, ai duhej të ishte në shtëpi. Kjo, përkundrazi që nuk gjendej asgjë mbi to, u bë kjo. Ajo çështje do zgjidhet në Strasburg“, tha Berisha.
