Policia ka ndërmarrë pasditen e djeshme një operacion të gjerë në kryeqytet, pas 12 urdhër-arresteve të lëshuara nga SPAK, për emra të njohur të krimit dhe Policisë së Shtetit ku në pranga ranë Erzen Breçani dhe djali i madh i tij, Eralbi Breçani. Ata akuzohen për përkrahje te autorit te krimit dhe pastrim parash.
Mes personave të arrestuar janë Bujar Gërmizi dhe Besmir Mustati. Mësohet se Germizi, që tashmë ka mbiemrin Ajeti, akuzohet për krijim kushtesh për vrasje, ndërsa është një emër i njohur në botën e krimit në Kukës.
Në pranga është vënë dhe shefi i Krimeve të Komisariatit numër 6 në Tiranë, Dedan Gjoni. Një prej akuzave që rëndojnë mbi të është ajo e sigurimit të kushteve për të kryer vrasje. Në pranga është vënë edhe Jonida Babameto, oficere e drejtorisë së Kufirit dhe Migracionit. Nuk dihen akuzat konkrete që rëndojnë mbi të.
Ndërkohë, është shpallur në kërkim Ervin Mata, një personazh i njohur si biznesmen por i përfolur shpesh në qarqe të errëta.
