Tensione dhe përplasje fizike janë regjistruar mëngjesin e kësaj të hëne, në hyrje të Kuvendit, aty ku pritet të mbahet seanca për miratimin e buxhetit 2024.
Gardistët janë vendosur “gardh” tek dera e Kuvendit dhe nuk kanë lejuar deputetët e opozitës të futen në sallën e Parlamentit pa u kontrolluar fillimisht. Kjo ka sjellë dhe reagimin e këtyre të fundit.
“S’ju vjen zor, e keni kthyer shtet policor”, dëgjohet duke thënë Gazment Bardhi. Pasi janë kontrolluar deputetë janë lejuar të futen në sallë.
Kujtojmë se opozita insiston në bllokimin e punimeve të Kuvendit pasi shprehen se të drejtat e tyre po shtypen nga mazhoranca. Sipas opozitës, në mënyrë antikushtetuese, PS po pengon ngritjen e komisioneve hetimore të kërkuara nga PD si dhe po tenton të ‘përcaktojë’ opozitën duke refuzuar ndryshimet në komisionin e posaçëm të reformës zgjedhore.
