Shqipëria do të presë në “Air Albania” Ishujt Faroe ditën e nesërme në orën 20:45, për të përmbyllur një fushatë fantastike kualifikuese.
Kuqezinjtë ia dolën të jenë pjesë e Europianit që do të mbahet në verë në Gjermani në trasnfertë ndaj Moldavisë, por edhe sfida e 20 nëntorit do të jetë shumë e rëndësishme pasi synohet ruajtja e vendit të parë në grup.
Për këtë skuadrës së Silvinhos i mjafton një pikë ndaj Ishujve Faroe.
Për këtë takim, Federata Shqiptare e Futbollit bëri një njoftim të rëndësishëm për tifozët që do të jenë të pranishëm në stadium.
NJOFTIMI:
Federata Shqiptare e Futbollit dëshiron të njoftojë të gjithë tifozët shqiptarë që do të jenë të pranishëm në ndeshjen e ditës së nesërme Shqipëri – Ishujt Faroe, (20 nëntor, ora 20:45), e vlefshme për kualifikueset e Kampionatit Europian “Gjermani 2024” mbi orarin e hyrjes në stadiumin “Air Albania”.
Hyrja e tifozëve në stadium do të nisë nga ora 17:45. FSHF kërkon bashkëpunimin e të gjithë tifozëve shqiptarë që do të ndjekin ndeshjen në stadium të paraqiten në kohë, në mënyrë që të mos krijohen radhë ose vonesa dhe të gjithë të jenë në vendin e tyre në ora 20:45, kur pritet të nisë edhe kjo ndeshje. 20 nëntori duhet të jetë një ditë feste për të gjithë.
Federata Shqiptare e Futbollit ju falënderon për mbështetjen e vazhdueshme dhe të pashtershme që i jepni gjithmonë ekipit Kombëtar. Shpresojmë në mirëkuptimin tuaj dhe në mbështetjen tuaj të përhershme.
