Shqipëria është zyrtarisht e kualifikuar në Euro 2024. Festa kuqezi pushton çdo cep të botës ku flitet shqip, falë Kombëtares shqiptare që mori pikën e nevojshme përballë Moldavisë.
Heronjtë kuqezi do të rikthehen këtë mbrëmje në atdhe dhe pritja sigurisht do të jetë e zjarrtë.
Një turmë tifozësh janë nisur drejt aeroportit të Rinasit aty ku heronjtë kuqezi do të zbarkojnë.
Avioni i parë Charter është nisur dhe sipas itenerarit, rreth orës 01:00 pritet të zbarkojë në Tiranë, ndërsa pak më vonë do të vijë dhe grupi i dytë në avionin tjetër.
Festa do të jetë e zjarrtë, ashtu si edhe herën e parë kur u kualifikuam në Euro 2016, me Kombëtaren shqiptare që mbërriti në atdhe pas fitores 0-3 në Armeni.
