Nga Boldnews.al
Ai nuk po bën më bujë. I harruar në një cep të Parlamentit, dikur i vetëshpallur si “mbrojtës i fshatarëve dhe hallexhinjve”, ish-numri dy i qeverisë shqiptare kërkon të shfaqet si protagonist, teksa ka propozuar që gratë që kalojnë ciklin menstrual një herë në muaj, të marrin raport mjekësor dhe tu paguhet nga shteti.
Një deklaratë që ai e shoqëroi edhe me “studim të thelluar” duke iu futur literaturave mjekësore dhe sociale. “A ka mundësi që grave dhe vajzave tu njihet periudha e ciklit si periudhë sëmundje dhe e paguar. Raport i paguar nga buxheti i shtetit, pasi po e konsiderojnë sëmundje lart e poshtë dhe është mirë që një iniciativë të tillë që nuk kushton shumë, që duhet kalkuluar të përfshihet në iniciativat e ministrisë së Shëndetësisë”-tha Braçe në Komisionin Parlamentar të Ekonomisë.
Po ashtu Braçe njihet si personazh aktiv në rrjetet sociale i cili përveçse ankohet pafundësisht si një “qytetar pa pushtet”, jep edhe receta si të zgjidhen problemet, duke mos kujtuar asnjëherë të vetme se është përfaqësues i kësaj qeverie dhe mazhorance parlamentare që për pak futet në vitin e 11 të qeverisjes. Gjithashtu ka qenë edhe zëvendëskryeministër, që kur iu propozua ai post shpërtheu në lot mallëngjimi.
Gjithçka ndodhi më pas ishte veçse një flluskë e madhe që nuk solli asgjë. U përqëndrua shumë tek sektori i bujqësisë dhe me shumë të drejtë pasi prej saj mban frymën gjysma e popullsisë së vendit. Po çfarë të mirash solli? Sot bujqësia është në ditët më të errëta. Pa subvencione, e pambrojtur, pa treg të garantuar, pa ndihmë e mbi të gjitha shumë bujq në vend janë kthyer si “bujkrobër modern” që vlejnë sa për tu marrë votën.
Edhe ato para të ofruara si grante për fermerët shqiptarë nga BE përfunduan në duaert e oligarkëve dhe njerëzve të pushtetit. Fondet e IPARD II u bllokuan nga BE pikërisht për shkak të abuzimeve me to, pasi nuk shkuan për fermerët, por për bosët e biznesit dhe politikës. Braçe nuk u ndje kurrë për këtë problem madhor. Të jemi para një impotence të dukshme verbale?! Koha po e tregon se kjo lloj “sëmundje” ka prekur edhe ata pak personazhe që njihen si “safi socialist” dhe jo qenie gjenetikisht të modifikuar si Rilindje.
Megjithatë Braçe ka kohë që hesht për bujqësinë, ka muaj që e shumta mund të grindet me ndonjë “ekspert ministrie” duke bërë lajm veten, por pa asnjë bereqet. Nuk ka gojë të flasë për oligarkinë pasi kur ishte zëvendëskryeministër me firmën e tij dhe me “autorizim nga i madhi” ka privilegjuar botën e biznesit që majmet e majmet edhe me “dhjamin e pleshtit fshatar”.
Tashmë Braçe ka përfunduar pafund në gojët e grave, sidomos ato të artikuluara mirë që drejtojnë shoqata dhe OJQ të financuara nga projekte kombëtare dhe ndërkombëtare. Flasin mirë për Braçen disa prej tyre. E quajnë të drejtë që gratë të marrin raport dhe paguhen për kohën që kalojnë ciklin menstrual, të paktën katër ditë në muaj. Disa të tjera thonë se është një lloj diskriminimi pasi “cikli menstrual” nuk duhet trajtuar si sëmundje, por diçka e natyrshme dhe nëse një grua ka probleme shëndetësore me ciklin menstrual, çdo mjek apo mjeke do i jepte raport, pa pasur nevojën e “draftit Braçe” për periodat e çdo gruaje në moshën e caktuar.
Nëse Braçe do e kishte seriozisht këtë nismë padyshim që duhet të mendonte edhe për andropauzën. Është një lloj cikli që edhe pse nuk quhet sëmundje e mirëfilltë prek meshkujt në një moshë të caktuar, zakonisht pasi kalojnë mbi 50 vjeç. ‘Andropauza shpesh është identifikuar me një rënie të seksualitetit dhe performancës së burrave të kësaj moshe, por edhe me gjendjen e tij psikologjike, e cila është krejt e ndryshme (në këtë gjendje, mashkulli që ka kaluar në andropauzë është më i lodhur, më i irrituar)’. Në vijë të përgjithshme ky është përkupfizimi që i japin mjekët adropauzës.
Një mashkull i lodhur, i irrituar dhe për më shumë që ka pushtet jo pak por një dekadë shfryn “impotencën” në dhunën ndaj qytetarëve, mbipushtetin, kontrollin e plotë mbi çdo pushtet në letra të pavarur dhe mbi të gjitha eksitohet nga paraja, korrupsioni dhe megalomania duke shëtitur jashtë vendit për të kapur noj qushe mediatike për tu quajtur si zgjidhës u halleve të botës si emigracioni, luftërat dhe konfliktet mes vendeve. Po për adropauzën a do të ketë ndonjë “draft”?
