Shefi i Shtabit të Përgjithshëm izraelit, Herzi Halevi njoftoi sot zgjerimin e operacioneve ushtarake në Rripin e Gazës.
“Ne jemi pranë çmontimit të sistemit ushtarak në Rripin verior të Gazës. Ne do të vazhdojmë të zgjerojmë operacioni në zona të tjera”, tha sot Halevi gjatë një vizite në Gaza.
Komandantët e organizatës militante palestineze “Hamas” duhet të eliminohen sistematikisht dhe të shkatërrohet infrastruktura e saj.
“Për këtë qëllim, gjithnjë e më shumë rajone do të jenë në shënjestër”, shtoi ai.
Deri më tani, trupat tokësore të Izraelit janë fokusuar në pjesën veriore të Rripit të Gazës në javët e fundit.
Megjithatë, ekspertët parashikojnë një zgjerim të mundshëm të operacioneve edhe në jug, ku tashmë janë përsëritur sulme ajrore.
Një ofensivë e mundshme tokësore do të përkeqësonte më tej situatën tashmë shkatërruese humanitare.
Pothuajse 1,6 milionë nga 2,2 milionë banorë të rajonit bregdetar janë zhvendosur si rezultat i luftimeve.
Shumica prej tyre kanë ikur në jug të rajonit bregdetar pasi ushtria izraelite u bëri thirrje civilëve që të evakuoheshin nga veriu.
