Nxënësit e klasave të nënta në shkollën 9-vjeçare “Kosova” në qytetin e Lezhës kanë bojkotuar mësimin këtë të enjte, pasi kërkojnë rikthimin në punë të ish mësuesit të tyre të Matematikës, Ramiz Bajrami.
Ky i fundit u pezullua nga puna me vendim të Ministrisë së Arsimit, pasi në videon e mëposhtme, të shpërndarë në rrjet pak dite më parë, ai shfaqet duke goditur një prej nxënësve gjatë orës mësimore. Nxënësit e konsiderojnë si të padrejtë vendimin e Ministrisë së Arsimit, pasi sipas tyre ai u provokua dhe ra pre e një kurthi brenda klasës.
“Unë quhem Sara Deda dhe jam nxënëse e klasës së 9-A. Sot kemi lajmëruar drejtorinë e shkollës që do bojkotojmë orën e mësimit se nuk jemi dakord për vendimin që është marrë për profesorin e Matematikës dhe Fizikës, profesor Ramiz Bajrami. Është shfaq një video e profesorit, ku në ato video nuk është tregu dhuna. Nëse nxënësi është ndjerë i dhunuar ai duhet të na sjellë një raport mjekësor që është i dhunuar fizikisht dhe psikologjikisht. Atëherë ne s’jemi fare dakord. Ma vjen gjynah për profesorin, se ka rënë pre e një loje që mund të jetë bërë nga klasa dhe çdo profesor mund të bie. Nëse profesor Ramizi përjashtohet, atëherë duhet të përjashtohet çdo lloj mësuesi që është në këtë shkollë se gjithë mësuesit e kanë pasur një problem kur kanë dalë nga vetja. Ne nuk do futemi në mësim pa profesor Ramizin, këtë e kemi të qartë. Nuk na intereson fare, ne duam vetëm që të vijë profesor Ramizi dhe t’ua bëjmë të qartë të gjithëve që pa profesor Ramizin ne asnjëri nuk futemi në mësim”, thotë nxënësja Sara Deda.
“Ne kemi vendosur që të bojkotojmë. Nuk do të hyjmë në mësim derisa profesori ynë të kthehet në krye të punës. Përderisa nxënësi nuk ka pasur shenja dhune e kanë hequr kot nga dhuna e kanë heq kot nga puna dhe ne s’do futemi në mësim derisa profesori të kthehet në punë.
Kemi dalë në protestë për profesorin tonë dhe nuk futemi në mësim. Nuk pranojmë asnjë mësues tjetër që të na bëjë mësimin. E kanë hequr prej pune pa të drejtë”, thonë nxënësit.
Stafi pedagogjik dhe Komisioni i Disiplinës nuk ka kërkuar asnjë lloj mase ndaj mësuesit, ndaj dhe nxënësit e irrituar kërkojnë që ministria të tërhiqet nga ky vendim i padrejtë.
“Stafi pedagogjik dhe Komisioni i Disiplinës nuk ka kërkuar asnjë lloj mase për me e heq mësuesin nga puna. Ky vendim është marrë nga Ministria e Arsimit dhe është diçka e padrejtë. Nëse Komisioni i Disiplinës dhe stafi pedagogjik nuk kanë pranuar që profesori të largohet, atëherë kurrkush se ka këtë të drejtë. Ne jemi duke kërkuar këtu të gjitha të drejtat e profesorit që janë duke ja humbur”, tha nxënësja Sara Deda.
Siç shihet dhe në videon e mëposhtme, mësuesi Ramiz Bajrami i agravuar nga sjellja e nxënësit, e qëllon të riun me shpullë në qafë pranë kokës. Ky i fundit dëgjohet se i kërkon falje, teksa duket se durimi i mësuesit ka sosur.
Në lidhje me këtë çështje nxënës të shkollës “Kosova” dhe prindër po përgatisin dhe një peticion drejtuar Zyrës Vendore të Arsimit Parauniversitar në Lezhë dhe ministrisë, ndërsa paralajmërojnë bojkot të vazhdueshëm të mësimit deri në rikthimin në punë të mësuesit Ramiz Bajrami.
