“Air Albania” ka reaguar pasi mediat raportuan se kjo kompani ajrore është venë nën sekuestro për shkak të borxheve të papaguara.
Pavarësisht se prej 5 vitesh nuk ka asnjë transparencë dhe nuk publikon bilancet dhe të ardhurat e saj, kompania me kapital shtetëror kërkon të mbulojë “diellin me shoshë” pasi ditën e sotme njofton se “financat e saj janë të shëndetshme”.
Kompania ajrore “Air Albania” pranon faktin se aksionet e saj janë në sekuestro por e quan të rremë lajmin e publikuar një ditë më parë.
“Air Albania qartëson opinionin publik se gjendja financiare e kompanisë është e shëndetshme dhe çdo raportim ndryshe është ekzagjerim i një procedure private mes kompanisë dhe palëve të treta, praktikë e shpeshtë në aktivitetet tregtare. Mbetemi të angazhuar në tregun vendas dhe ndërkombëtar me përvojën më të shkëlqyer të udhëtimit me destinacione të reja dhe oferta të dedikuara për pasagjerët tanë”, – thuhet ndër të tjera në reagimin e kompanisë.
‘Air Albania’ nisi fluturimet në vjeshtën e vitit 2019, ndërkohë që, sipas të dhënave të fundit të disponueshme, që i përkasin muajit korrik 2023 ajo është kompania e dytë zotëruese e tregut ajror, me 8.27%.
Kujtojmë që ‘Air Albania’ është promovuar dhe përdoret personalisht edhe nga kryeministri Edi Rama i cili jo pak herë është akuzuar nga opozita për shpenzime miliona euro për udhëtime ‘charter’.
