Policia e Sarandës gjeti mbrëmjen e djeshme në Xarrë të Konispolit mbetjet kockore humane, tek varrezat monumentale të çamëve, pranë xhamisë.
Mësohet se pjesa e gjetur është koka e një njeriu, e cila ka ende inde të buta dhe mendohet se ngjarja është e muajve të fundit. Ka qenë një informacion i marrë nga Policia ajo që bëri të mundur zbulimin e kokës së groposur. Mbetjet kockore janë dërguar në Institutin e Policisë Shkencore, për ekzaminime të mëtejshme
Burime për mediat bëjnë me dije se dyshimet kryesore janë se mbetjet kockore mund t’i përkasin trupit të Fatmir Sulovarit alias Krasniqi apo Leonard Thodhorit i njohur si “Koçole”, që rezultojnë të zhdukur prej 6 prillit 2023. Policia ka nisur kërkimet në zonë për të zbuluar pjesë të tjera të trupit.
Por, ky nuk është rasti i vetëm në këtë zonë ku gjenden koka të prera dhe ngjarjet mbeten mister. Kanë ndodhur të paktën tre episode të ngjashme.
Në 8 tetor 2005, në vendin e quajtur “Vasilikua” në Konispol u gjet trupi i 45-vjecarit, Zihni Myderizi. Trupit të tij i mungonte koka. Ngjarja dyshohet se kishte si motiv larjen e hesapeve. Viktima varroset pa kokë dhe prej asaj date nuk është gjetur as koka e as autorët. Hetimet janë kryer nga shumë sektorë të Policisë, madje hetimet janë shtrirë deri në Greqi por pa sukses.
Në 16 tetor 2008, në rrugën Turizëm – Kanali i Çukës në Sarandë, nga një grup fëmijësh u gjet një kafkë koke e dekompozuar. Kafkës i mungonte pjesa e poshtme e saj. Në vendin e ngjarjes u gjetën edhe dy kocka të vogla. Prej asaj dite nuk është identifikuar as personi kujt i përkiste kafka e as shkaku i vdekjes.
Në 9 maj 2016 në Igumenicë, iu pre koka 26-vjeçarit Bledar Terpollari, i cili sipas informacioneve frekuentonte edhe zonën e Konispolit në Sarandë. Shkak ishte prishja e pazareve të drogës. Koka e viktimës nuk iu gjet kurrë.
