Një video e xhiruar nga tifozët në Stamford Bridge tregon Mateo Kovacic, sot te City, që duket sikur feston në momentin kur ish-klubi i tij barazon me një penallti në minutën e 94-t.
Tifozët e City-t kanë mbetur të tronditur nga gjesti i mesfushorit 29-vjeçar, që verën e kaluar u transferua nga Chelsea te Qytetarët për 25 milionë euro.
Ndërsa, tifozët e Chelsea-t shikojnë në atë gjest lidhjen e ngushtë të lojtarit me ish-skuadrën e tij, ku luajti për pesë sezone para se të largohej.
“Oh Zot, rikthejeni në shtëpi”, ka shkruar një tifoz i klubit londinez, ndërsa një tjetër ka shkruar: “Mund ta heqësh atë lojtar nga Chelsea, por nuk do ta heqësh kurrë Chelsea-n nga ai lojtar”.
Në pritje që Kovacic të bëjë të ditur se reagimi i tij ka ardhur nga zemërimi për një fitore të zbehur në minutat e fundit, City vazhdon të kryesojë renditjen e Premier League me një pikë avantazh ndaj Liverpool dhe Arsenal.
Ndërkohë, Chelsea i Pochettino-s ka marrë në shtëpi një pikë dhe gëzimin për mënyrën si ka ardhur, por nuk ndryshon shumë për këtë fillim zhgënjyes të sezonit: Blutë janë në vendin e dhjetë, 12 pikë larg kreut.
