Ministrja e Brendshme britanike, Suella Braverman është shkarkuar nga posti.
Kryeministri i Britanisë së Madhe, Rishi Sunak mori vendimin për shkarkimin e ministres kontroverse të Brendshme, pasi ajo sfidoi javën e kaluar.
Një zyrtar nga Downing Street, deklaroi se Sunak i kishte kërkuar Braverman të largohej nga qeveria dhe ajo kishte pranuar.
Sunak shkarkoi Bravermanin pasi ajo shkaktoi zemërim të gjerë me kritikat ndaj trajtimit të protestave pro-palestineze nga Policia.
Ndërkohë Partia Konservatore njoftoi se Rishi Sunak po kryen një riorganizim ministror për të “forcuar ekipin e tij në qeveri për të dhënë vendime afatgjata për një të ardhme më të ndritshme”.
Ndryshimet në kabinetin qeveritar mund të jenë shansi i fundit i kryeministrit britanik për të vulosur autoritetin e tij në ekipin drejtues të partisë konservatore përpara zgjedhjeve të përgjithshme që priten vitin e ardhshëm.
Sunak do t’i portretizojë lëvizjet si një shans për të promovuar ministrat më të rinj dhe për të pastruar disa anëtarë të kabinetit me performancë të dobët.
Kjo është hera e dytë që zonja Braverman humbet postin e ministres së Brendshme, pasi ajo dha dorëheqjen nga qeveria e Liz Truss duke thyer kodin ministror.
Sunak e riemëroi atë më pak se një javë më vonë, kur mori detyrën si kryeministre.
Javën e kaluar, Barverman shkroi një artikull në gazetë që kritikoi trajtimin e Policisë Metropolitane ndaj një marshimi pro-palestinez për Ditën e Armëpushimit.
Kryeministri u vu nën presion për të vepruar pasi Braverman u akuzua për minimin e pavarësisë së policisë.
Kritikët – si nga partitë e opozitës ashtu edhe nga deputetët e tjerë konservatorë – i quajtën komentet e zonjës Braverman “fyese”.
Në një artikull për The Times, Braverman akuzoi policinë se “luan me favoritë” me mënyrën se si i trajton protestat e diskutueshme duke treguar një qëndrim më të butë ndaj protestuesve të krahut të majtë sesa homologët e tyre të krahut të djathtë.
Gjatë fundjavës, protestuesit e ekstremit të djathtë u përleshën me policinë në Westminster. Gjithashtu marshimet pro Palestinës përfunduan gjithashtu me arrestime.
