Nga Boldnews.al
Kompania e telefonisë celulare, “One”, pa asnjë paralajmërim paraprak u ndërpret shërbimin abonentëve, të cilët janë të vonuar në pagesën e faturës mujore.
Qytetarët mund të kenë arsye të ndryshme për mos-pagimin në kohë të detyrimeve ndaj shoqërisë “One”. Por kjo nuk i jep asnjë të drejtë kompanisë celulare që të kryejë ndërprerje të menjëhershme të sinjalit telofonik.
Ligji “Për komunikimet elektronike dhe postare” parashikon detyrimin që kompanitë celulare të njoftojnë paraprakisht klientët për detyrimin dhe t’u lënë qytetarëve 15 ditë kohë pas kalimit të afatit të kryejnë pagesën. Vetëm pas njoftimit paraprak dhe kalimit të këtij afati 15-ditor, kompania ka të drejtën për të ndërprerë shërbimin.
Por, Autoriteti i Komunikimeve Elektronike dhe Postare (AKEP) konstaton se ‘One” shpk nuk e ndjek këtë praktikë ligjore. Institucioni rregullator ka vendosur që, krahas shkeljeve të tjera, të gjobisë shoqërinë “One” edhe për arsyen se nuk tregohet korrekte me njoftimet për klientët.
Shkeljet e “One”
Në 24 Tetor 2023, Këshilli Drejtues i AKEP-it vendosi të gjobisë me 10 milionë lekë të reja kompaninë “One”, pasi konstatoi disa shkelje ligjore të përsëritura.
Një ndër këto shkelje është ndërprerja pa paralajmërim e shërbimit celular ndaj klientëve që vonojnë kryerjen e pagesës mujore ndaj kompanisë së telefonisë së lëvizsshme.
AKEP zhvilloi një inspektim disa-javor pranë kompanisë “One”, i cili filloi në Mars të vitit 2023.
Në raportin përfundim, të dorëzuar në Shtator të këtij viti, Grupi i Inspektimit i sugjeron Këshillit Drejtues që të sanksionojë me gjobë shoqërinë “One”, ndër të tjera edhe për faktin se nuk ka respektuar detyrimet ligjore për të njoftuar paraprakisht abonentët për kufizimin apo ndalimin e aksesit në shërbimet e tyre.
Pas këtij rekomandimi, Këshilli Drejtues i AKEP-it zhvilloi një seancë dëgjimore me përfaqësuesit e kompanisë ‘One”, për të marrë prej tyre argumentat mbi këtë situatë.
Përfaqësuesit e shoqërisë celulare kanë vendosur në dispozicion të AKEP-it një komunikim të brendshëm të departamenteve të kompanisë One Albania për dërgimin e një SMS tek 40 000 (dyzet mijë) përdorues me tekst:
“One ju rikujton datën për pagesën e faturës suaj pranë dyqaneve të One, për të shmangur bllokimin e shërbimeve tuaja. Nëse ju tashmë e keni paguar detyrimin tuaj të radhës, mos e konsideroni këtë sms. Faleminderit.”
AKEP ka konstatuar se një njoftim i tillë nuk përmbush detyrimet ligjore dhe i ka kërkuar shoqërisë “One” që të provonte lajmërimin e abonentëve specifikë për ndërprerjen e shërbimit.
AKEP-i kreu verifikimin faktik mbi “loge-t” e prezantuara nga përfaqësuesi i sipërmarrësit One Albania.
Gjatë verifikimit u konstatua se këto loge, kanë informacione për datën, orën, llojin e sms së dërguar (në grup apo i dedikuar), marrësin e “SMS”, informacion nëse “SMS” është dërguar me sukses apo jo etj., por në asnjë rast të përmbajtjes së “SMS” që sipërmarrësi One Albania sh.a., ka dërguar tek pajtimtarët e caktuar.
Përfaqësuesit e “ONE” pohuan se kompania nuk i ruan SMS-të që i dërgohen pajtimtarëve.
Gjatë procesit të verifikimit, nuk arrit të bëhej dallimi nëse “SMS” që është dërguar te pajtimtarët ka qenë specifike për paralajmërim për ndërprerjen e shërbimit apo me ndonjë përmbajtje tjetër e dërguar nga ana e sipërmarrësit.
Gjithashtu, nga loget e verifikimit të bërë pranë ambienteve të sipërmarrësit One Albania sh.a., por edhe nga provat e paraqitura me vonë nga sipërmarrësi, rezulton që “SMS” e dërguara janë Broadcast, pra që dërgohen në masë për pajtimtarët, dhe jo për secilin pajtimtar.
Në përfundim të verifikimeve, Autoriteti i Komunikimeve Elektronike dhe Postare konstatoi se shoqëria “One” nuk ka zbatuar detyrimet që rrjedhin nga neni 109 të ligjit “Për komunikimet elektronike”, i cili parashikon se: “Nëse pajtimtari nuk përmbush detyrimet kontraktore brenda afatit kohor të përcaktuar në faturë, sipërmarrësi është i detyruar t’i dërgojë pajtimtarit një njoftim me shkrim ose në një formë tjetër që është parashikuar dhe pranuar në kontratë nga pajtimtari, duke vendosur afatin kohor prej jo më pak se 15 ditëve për të përmbushur detyrimet kontraktore”.
Këshilli Drejtues i AKEP çmon, se kufizimi apo ndërprerja e shërbimit pa respektuar kushtet e nenit 109 të ligjit 9918/2008, “cënon rëndë interesat e pajtimtarit për një shërbim përherë e më të rëndësishëm në veprimtarinë e karakterit privat apo sipërmarrës të pajtimtarit”, dhe për këtë vendosi të vendosë masë administrative ndaj kompanisë “One” për këtë shkelje, si edhe të tjera, duke e gjobitur me 10 milionë lekë të reja (rreth 100 mijë euro).
