Ditën e djeshme, kreu i PD-së së vulës Lulzim Basha, ka zhvilluar një takim me familjen e Pjetër Lulit, i persekutuar politik në fshatin Gurëz të Kurbinit.
Këtë gjë e ka bërë me dije vetë ai, përmes një potimi në rrjetet sociale, teksa ka ndarë dhe fototo nga pritja që i është rezervuar në familjen në fjalë, ndërsa të pranishëm aty janë dhe banorë të tjerë të Kurbinit.
“Kënaqësi të isha sot në familjen e Pjetër Lulit, i persekutuar politik në fshatin Gurëz të Kurbinit. Biseduam për hallet dhe problemet e familjeve të atyre që u përballën me diktaturën dhe mbajtën gjallë shpresën për liri e demokraci. Sot ata kanë ende plagë të pashëruara, ndaj dhe është e domosdoshme për të bërë më shumë për shtresën e të përndjekurve politikë. Shkëmbyem mendime të ndryshme për situatën ku ndodhet vendi dhe çfarë duhet bërë që fëmijët tanë të mos ikin, por të ndërtojnë të ardhmen në vendin e tyre.” – ka shkruar Basha.
Por, ajo që vihet re nga fotot e publikuara nga vetë, Lulzim Basha, është se pjesë e takimit ka qenë dhe Mustafa Martinaj, babai i Ervis Martinajt. Në një prej fotove ata shfaqen të dy me gotat e rakisë në dorë.
Ervis Martinaj njihet si një personazh me shumë dritë-hije, teksa prej më shumë se një viti është zhdukur në mënyrë misterioze dhe nuk dihet ende fati i tij, nëse është i gjallë apo i vdekur. Para se të zhdukej, ai ishte kthyer në një personazheve më të kërkuar nga SPAK në kuadër të operacionit “Plumbi i Artë”.
Vlen të theksohet fakti se Lulzim Basha vazhdon të kërkojë çdo ditë vetting për politikanët, njësoj siç u bë me magjistratët, teksa në propozimin e ri, përveç kontrollit të pasurisë ka kërkuar dhe kontrollin e figurës dhe të personalitetit të funksionarëve.
