Që prej ditës së djeshme, zjarri i rënë në zonën e ish-kombinatit metalurgjik, në Bradashesh, vijon të jetë ende aktiv.
Siç njoftoi policia, zjarri në një pikë për grumbullimin e skrapit ra rreth orës 11:15. Shkak dyshohet një shkëndijë e krijuar si pasojë e fërkimit të mbetjeve metalike.
Policia, zjarrfikësja dhe punëtorët e fabrikës Kurum që zotërojnë pikën e skrapit punuan për zhvendosjen e mbetjeve dhe izolimin e flakëve. Megjithatë, situata paraqitet e rënduar edhe mëngjesin e ditës së sotme. Tymi po përhapet duke shkaktuar ndotje për të dytën ditë radhazi.
Drejtuesi i sigurisë së jashtme të fabrikës ‘Kurum’, Merkur Çipi sqaroi për mediat se shkak i zjarrit që ra në pikën e grumbullimit të skrapit u bë një shkëndijë elektrike që lëshoi një bateri.
“Kjo ngjarje ka ndodhur aksidentalisht nga një bateri që është ndodhur në thellësi të grumbullit të skrapit. Nga shkëndija që ka marrë atje, në orën 10:25 ka dhënë një shkëndijë tymi në lartësinë e skrapit. Unë mendoj se kjo ngjarje aksidentale është një fatkeqësi për ‘Kurumin” dhe të gjithë ne. Momentalisht po digjen materiale plastike, të cilat ndodhen brenda skrapit. Tymi që çlirohet padyshim është i dëmshëm për shëndetin, por nuk është bërë qëllimisht nga dora e njeriut. Është hera e parë që ndodh një ngjarje e tillë. 95% e flakëve në zonë u vu nën kontroll, por nga një shpërthim i një bombule gazi ndodhi një shpërthim që shkaktoi flakë në një tjetër zonë të skarapit”, tha ai.
