Marcelino Preka më së fundmi ka gjetur golin e parë me fanellën e Partizanit në Kategorinë Superiore. Si për ironi të fatit, ky gol vjen ndaj ekipit të vendlindjes, Vllaznisë.
Mbrojtësi shtatlartë pas shënimit të golit ngriti duart lart, si shenjë falje për shkodranët, por më pas ka prekur stemën e Partizanit në fanellë duke treguar se është profesionist dhe i bën “hyzmetin” uniformës që mban veshur.
Pas ndeshjes mbrojtësi i të kuqve ka dhënë edhe një prononcim të shkurtër për “MCN”.
“Nuk e filluam mirë. Ky ishte goli im i parë me Partizanin dhe shpresoj të jenë sa më shumë gola në vazhdimësi.
Bekim Balaj dihet që është një legjendë, një lojtar mjaft i fortë, me eksperiencë. Më vuri në vështirësi në luftën në ajër, por besoj se ia dola.
Duhet shumë punë për të arritur më shumë”, u shpreh Marcelino Preka.
