Partia Socialiste i ka kërkuar Sekretariatit të Etikës përjashtimin me 10 ditë nga aktivitetet parlamentare për tre deputetë të Partisë Demokratike, duke i konsideruar ata si përgjegjës për kaosin e shkaktuar në seancën e djeshme plenare.
Më konkretisht, mazhoranca kërkon marrjen e masave disiplinore ndaj deputetëve Ervin Salianji, Petrit Doda dhe Edmond Spaho. Shkresa është firmosur nga 15 deputetë socialistë. Sekretariati i Etikës do të mblidhet sot në një seancë online, në orën 14:30. Komisioni i Etikës është zhvendosur online pasi deputeti i PD-së, Flamur Noka shkuli mikrofonat në sallën ku zhvilloheshin mbledhjet.
Ditën e djeshme, opozita i përmbysi karriget e deputetëve socialistë rreth foltores së Kuvendit, ndërsa deputeti Ervin Salianji ndezi dhe dy tymuese, një blu dhe një mavi tek foltorja. Sipas PS-së, Salianji është ndihmuar dhe nga deputet Petrit Doda dhe Edmond Spaho.
Në njoftimin e Kuvendit thuhet se të përjashtuar nga mbledhja online e sekretariatit janë deputetët Saimir Koreshi dhe Bledion Nallbati, për shkak të trazirave të seancës së kaluar.
