Janë zbardhur detaje të reja nga atentati i regjistruar mbrëmjen e djeshme në kryqëzimim e Bathores në Kamzë, ku dy persona të identifikuar, me motor, qëlluan me armë zjarri ndaj 46-vjeçarit Agim Hida, duke e lënë të plagosur. Mësohet se në vendin e ngjarjes, unuiformat blu kanë gjetur 3 gëzhoja, ndërsa Hida ka marrë 2 plumba në këmbë dhe ndodhet jashtë rrezikut për jetën.
Ndërkohë është zbardhur dhe dinamika e ngjarjes. Agim Hida ka qenë i ulur në një lokal, kur autorët janë afruar me motor dhe njëri prej tyre ka zbritur duke e qëlluar me armë nga një distancë e afërt duke e lënë të plagosur. Më pas ata janë larguar në drejtim të paditur dhe Policia ende nuk i ka identifikuar.
Autoritetet nuk kanë ende një pistë konkrete për ngjarjen, por verifikimet kanë nisur për të kaluarën e vëllait të Agim Hidës, Flamur Hida, i njohur me nofkën si “Lenci i Yzberishtit, pasi disa vite më parë është akuzuar se ka kryer një vrasje në zonën e Yzberishtit në Tiranë. Në komisariatin nr. 5 janë shoqëruar vetëm dëshmitarë okularë dhe persona që mund të kenë dijeni për ngjarjen, por pa dhënë ndihmë në hetime.
Flamur Hida, në bazë të vendimit të Gjykatës së Rrethit Gjyqësor Tiranë të datës 13 tetor 1998, është dënuar me 12 vjet e 6 muaj burgim, për veprat penale te “Vjedhjes me armë me pasojë vdekjen” si dhe të “mbajtjes pa leje të armëve luftarake”. Pas trazirave të vitit 1997, kur krimi mori pushtet të mirëfilltë, atëherë 17-18 -vjeçar, Flamur Hida, në bashkëpunim me Avdillarin kryen vjedhjen me pasojë vdekjen të shtetasit italian Stefano Rossi. Hida fillimisht mori dënimin me 12.5 vjet burgim, por më tej ai është dënuar sërish. Këtë herë, me vendimin e Gjykatës së Apelit Tiranë, më datë 28 janar 2002, ka marrë 20 vjet burgim, për veprat penale të “vjedhjes me armë të kryer në bashkëpunim”, ndaj qytetarëve Bedri dhe Agim Ago. Po ashtu, me vendimin e datës 18 Korrik 2007, të Gjykatës së Rrethit Tiranë, Hida është dënuar me 5 vjet e 4 muaj burgim, për veprat penale “Plagosjes me dashje” dhe të “armëmbajtje pa leje” ndaj Aqif Lamit. Në operacionin e koduar “I harruari”, u sekuestruan përveç një arsenali të tërë armësh dhe një certifikatë personale e falsifikuar që përdorte Flamur Hida si mjet identifikimi, me identitet tjetër, të rremë.
