Policia e Tiranës, me vendim të Gjykatës ka sekuestruar pasuri të paluajtshme, me vlerë rreth 1 milion euro, që dyshohet se e kanë burimin nga veprimtari kriminale në fushën e narkotikëve.
Në kuadër të operacionit policor të koduar “Villas” i janë sekuestruar pasuritë shtetasit Fran Merdhoçi, 57 vjeç dhe familjarëve të tij. Më konkretisht, i janë sekuestruar dy vila në Dobresh të Tiranës, vlera e të cilave arrin rreth 1 milion euro, sipas autoriteteve policore.
“Nga veprimet hetimore dyshohet se pasuritë e sekuestruara e kanë burimin nga veprimtaritë kriminale të kryera nga shtetasi Fran Merdhoçi, të cilin Gjykata e Shkallës së Parë për Krimet e Rënda Tiranë e ka dënuar me 10 vjet e 6 muaj burgim, për trafikim lëndësh narkotike, kryer në bashkëpunim.” – thuhet në njoftimin e bluve të kryeqytetit.
