Deputetët e Partisë Demokratike duket se janë të vendosur të mos e lejojnë mbledhjen e Konferencës së Kryetarëve, nëse në të nuk merr pjesë kreu i grupit parlamentar Gazment Bardhi, i cili u përjashtua nga mazhoranca me 10 ditë nga aktivitetet parlamentare.
Fillimisht, deputetët e opozitës bllokuan sallën e Konferencës së Kryetarëve dhe nuk lejuan zhvillimin e mbledhjes, e cila ishte parashikuar që të niste në orën 10:00. Mazhoranca tentoi ta mbante në sallë tjetër, pa praninë e opozitës, por as aty nuk i kanë lejuar.
PS tentoi ta mbante mbledhjen dhe në zyrën e kryeparlamentares Lindita Nikolla, por sërish dhe aty e kanë bllokuar deputetët e opozitës. Ata kanë bllokuar edhe ministrin e Financave, Ervin Mete, i cili do raportojë në mbledhjen e Konferencës se Kryetarëve, ku do te miratohet Projektbuxheti për vitin 2024.
Mazhoranca ka kërkuar më pas që mbledhja e Konferencës së Kryetarëve të shtyhet për në orën 13:00.
Bardhi pati një përplasje në korridor dhe me Nikollën, ku i kërkoi llogari se pse e ka përjashtuar. “Për ça më ke përjashtuar? Ça kam bërë që jam përjashtuar…Si qenka kjo rregullore. Po ti ke dy muaj që merresh me mua…”, i është drejtuar Bardhi, Nikollës.
Lindita Nikolla është parë në shkallët e Kuvendit e shoqëruar gjatë gjithë kohës nga garda.
Deputetët e opozitës kanë vendosur që veprimtaria parlamentare të bllokohet deri në momentin kur mazhoranca të plotësojë kërkesat e tyre siç janë komisionet hetimore si dhe ndryshimi i anëtarëve të Komisionit të Reformës Zgjedhore.
