Kreu i Partisë Demokratike, Sali Berisha ka deklaruar i prerë se nuk do të paraqitet në SPAK për t’u marrë në pyetje.
Megjithëse GJKKO ditën e sotme caktoi ‘detyrim paraqitje’ 2 herë në muaj, Berisha ka deklaruar se nuk e njeh vendimin të cilin e quajti anti-kushtetues.
Ish-kryeministri i bëri thirrje kryeministrit Edi Rama që të votojë në parlament heqjen e mbrojtjes që e mundëson mandati i deputetit.
“Jam i gatshëm të paraqitem para çdo institucioni akuze në çdo kohë pa hezitim, pavarësisht se çfarë konsiderate ke për personin që do të marrë në pyetje, nuk duhet të refuzohet. Çfarë ndodh, një gjykatëse merr për sipër të shkruaj në tryezën e saj Kushtetutën. Akti më i rëndë që mund të bëjë një prokuror apo gjykatës. Ka shkelur të drejtën e konventës së njeriut, për lirinë e lëvizjes. Kushtetuta, unë jam autor për heqjen e mbojtjes së deputetëve, e rrëzoi Edi Rama me argumentin se na arreston Sali Berisha. I them sot Edi Ramës sot, bëhu burrë dhe hajde ta votojmë. Kjo është një formë arrestimi me detyrim paraqitje”,-tha Berisha ne Opinion.
Pyetje: A do të paraqiteni në SPAK dy herë në muaj?
Sali Berisha: “Jo…jo dhe vetëm jo! Është vendim anti-Kushtetues. Nuk do të paraqitem absolutisht kurrë, nuk do shkoj asnjëherë. Unë një vendim që nuk e njoh dhe nuk e zbatoj. Është një vendim politik që nuk ka ndodhur kurrë në historinë e Shqipërisë. Është ekstrem si vendim”.
- GJKKO sot caktoi masën e sigurisë pë Sali Berishën:
Mbetet në fuqi masa e sigurisë “Detyrim Paraqitje” për kryedemokratin Sali Berisha dhe bllokimi i pasaportës që e ndalon ish-kryeministrin të dalë jashtë territorit të Shqipërisë në kuadër të hetimeve për privatizimin e ish-klub “Partizanit”.
Sali Berisha do të duhet të paraqitet 2 herë në muaj në BKH. Sipas vendimit të gjykatës ish-kryeministri duhet të shkojë në zyrat e Byrosë Kombëtare të Hetimit në datat 6 dhe 20 nëntor.
Në njoftim e GJKKO theksohet: “Urdhërohet shtetasi nën hetim Sali Berisha, të paraqitet të hënën e parë dhe të tretë të çdo muaji, ora 10:00 para oficerit të policisë gjyqësore Adelajda Metaj, pranë Prokurorisë së Posaçme kundër Korrupsionit dhe Krimit të Organizuar“.
