Lufta mes Izrealit dhe Hamasit, ka hyrë në një fazë ekstremisht të vështirë, në ditën e 18, me miliona vetë, në një krizë të vërtetë humanitare, me sulmet e ushtrisë izraelite që vetëm në 24 orët e fundit, sipas zyrtarëve palestinezë, kanë lënë të vdekur mbi 700 persona.
Shqetësimi më i madh në këto momente, edhe i agjencive kryesore të OKB, është ndalimi i operacioneve e ndërhyrjeve të menjëhershme pasi spitalet nuk kanë më, as energji elektrike, as naftë për gjeneratorët, as furnizimet e nevojshme për spital, nga uji i distiluar.
Edhe njëherë Sekretari i Përgjithshëm i OKB, Antonio Guterres përsërit thirrjen për një armë-pushim të menjëhershëm, duke nxitur Izraelin që të kërkojë edhe dorëheqjen e tij.
Mjekët në Gaza, po punojnë edhe sipas agjencive të Kombeve të Bashkuara, në kushte çnjerëzore, pasi në mes të një shiu bombash, pacientët e sidomos fëmijët, e kanë të domosdoshëm oksigjenin, që për çështje orësh, do të mbarojë.
Deri tani, po sipas autoriteteve palestineze, vetëm 8 nga 20 kamionët me ndihma drejt Gazës, kanë arritur të kalojnë kufirin përmes qytetit të Rafah.
Sipas OKB, 6 spitale kanë dalë jashtë funksionit, që nga nisja e luftës. Po sipas OKB, janë mbi 1 mijë pacientë çdo ditë që rrezikojnë jetën pasi varen nga dializa dhe mbi të gjitha, në rrezik është jeta e 130 bebeve, të ardhura në jetë para kohe.
