Policia greke në bashkëpunim me DEA-n Amerikane dhe forcat speciale greke sekuestruan 58 pako me rreth 67 kilogramë kokainë në Portin e Pireut.
Droga vinte nga Amerika Latine përmes kontejnerëve dhe ishte e destinuar për një grup kriminal shqiptar, sipas mediave greke. Në pranga kanë rënë 3 shtetas grekë, 31, 36 dhe 41 vjeç. Ky i fundit rezulton ish-futbollist në Greqi.
Sipas “The Toc”, karteli i Amerikës Latine dyshohet se iu afrua ish-futbollistit 41-vjeçar dhe dy punonjësve dhe i punësoi për të nxjerrë drogën nga kontejnerët dhe më pas për t’ia kaluar në zotërim rrjetit të tyre të trafikut nga Shqipëria.
Ish-futbollisti 41-vjeçar është pronar i një kompanie riparimi frigoriferësh dhe kishte një kontratë me portin si partner i jashtëm. Punonjësi i tij ishte 31-vjeçari, me profesion inxhinier frigoriferik, ndërsa 36-vjeçari ishte punonjës i portit dhe përgjegjës për evidentimin e defekteve në sistemet e ftohjes.
SIpas autoriteteve, 41-vjeçari ka qenë ai që ka pasur kontaktet me kartelin, të cilët e kanë informuar për numrin e kontejnerit me ngarkesën e kokainës.
