Gjykata e Tiranës ka lënë në masën e sigurisë “arrest me burg” 18-vjeçarin Armir Hasaj dhe bashkëpunëtorin e tij, Xhorxh Çuni, 19 vjeç, të arrestuar të premten si autorë të plagosjes së një 16-vjeçari, pasditen e 18 tetorit në Kamëz.
Dy adoleshentët kanë mbajtur të njëjtin qëndrim si para Policisë, ashtu edhe para togave të zeza, ku kanë dëshmuar se shkaku i sherrit ka qenë ngacmimi i të dashurës nga ana e të miturit. Ata saktësuan para gjykatës se 16-vjeçari kishte ngacmuar të dashurën e Çunit, i cili kishte rolin e ndihmësit për t’u arratisur, ndërsa Armir Hasaj qëlloi me një plumb të miturin.
Dy të rinjtë kanë treguar edhe vendin se ku kanë fshehur kallashnikovin që u përdor në ngjarje, por policia ende nuk e ka gjetur.
Kujtojmë se para policisë, Armir Hasaj ka dëshmuar se kishin lënë që të takoheshin për t’u sqaruar me 16-vjeçarin, por debati mes tyre ka degraduar dhe në gjaknxehtësi e sipër ka hapur bagazhin e makinës, ku mbante një armë kallashnikov dhe ka qëlluar vetëm një herë në drejtim të të miturit në këmbë. Ngjarja ka ndodhur pasditen e 18 tetorit, rreth orës 16:10, në rrugën “OSBE” në Kamëz.
Dyshohet se 16-vjeçari ka ngacmuar në Instagram njërën prej të dashurave të dy të rinjve, e cila u bë dhe shkaku i sherrit mes tyre. Burime për mediat bëjnë me dije se autori dhe i plagosuri janë shokë në lagje me njëri-tjetrin.
