Policia e Elbasanit ka arrestuar bashkëshortin e 57-vjeçares Merushe Gjuzi, e cila ditën e djeshme ndërmori aktin ekstrem ku u hodh nga furgoni në lëvizje në aksin rrugor “Peqin-Elbasan”, në fshatin Papër dhe gjeti vdekjen e menjëhershme.
Në pranga është vënë shtetasi Mahmut Gjuzi, 68 vjeç, banues në Rrogozhinë, i cili akuzohet për veprat penale “Dhuna në familje” dhe “Shkaktimi i vetëvrasjes”.
Sipas autoriteteve policore, nëpërmjet dhunës psikologjike të ushtruar ndaj bashkëshortes së tij, 68-vjeçari dyshohet se ka ndikuar te gjendja e rënduar psikologjike e Merushe Gjuzit, e cila në këto kushte, është vetëhedhur nga furgoni.
Shoqja e Merushe Gjuzit deklaroi ditësh e djeshme se ajo e mori aktin ekstrem pas sherrit me bashkëshortin e saj, me të cilin kishin konflikte të herëpashershme.
Njoftimi:
Në lidhje me ngjarjen e ndodhur mëngjesin e djeshëm, në aksin rrugor “Peqin-Elbasan”, ku humbi jetën shtetasja M. Gj., 57 vjeçe, si pasojë e vetëhedhjes nga dera e pasme e furgonit për pasagjerë, me të cilin udhëtonte, ju informojmë se:
Pas hetimeve të thelluara për rastin, specialistët për Hetimin e Krimeve të Komisariatit të Policisë Elbasan vunë në pranga bashkëshorin e 57-vjeçares, shtetasin M. Gj., 68 vjeç, banues në Rrogozhinë, për veprat penale “Dhuna në familje” dhe “Shkaktimi i vetëvrasjes”.
Nëpërmjet dhunës psikologjike të ushtruar ndaj bashkëshortes së tij, 68-vjeçari dyshohet se ka ndikuar te gjendja e rënduar psikologjike e shtetases M. Gj., e cila në këto kushte, është vetëhedhur nga furgoni.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Elbasan, për veprime të mëtejshme.
