Policia e Shkodrës ka publikuar pamjet nga momenti i zbulimit të “shtëpisë së barit” në fshatin në fshatin Trush i Poshtëm, njësia administrative Bushat.
Siç shihet dhe në videon e mëposhtme, 34-vjeçari Lorenc Trieshi, nga Fushë Kuqja e Kurbinit, ka qenë në gjumë në momentin kur uniformat blu janë futur brenda banesës së pabanuar, e cila ishte përshtatur për kultivim të bimëve narkotike.
Në pjesën hyrëse të banesës dhe në katër dhomat e saj, janë gjetur dhjetëra bimë narkotike të kultivuara në vazo, me anë të llambave elektrike. Nga këqyrja e ambienteve të banesës, përveç bimëve narkotike të kultivuara në vazo, është konstatuar dhe një sistem i përparuar elektrik dhe kondicionimi, i cili ishte i montuar në të katërta dhomat e banesës dhe në hyrje të saj.
Si autorë të kësaj veprimtarie kriminale janë arrestuar shtetasit Dedë Laca, 64 vjeç dhe djali i tij Anton Laca, 36 vjeç. Po ashtu edhe Lorenc Trieshi, i cili u kap në banesë dhe rezulton se është nipi i Dedë Lacajt.
Në cilësinë e provës materiale, uniformat blu kanë sekuestruar 82 llamba dhe aparate të ndryshme elektrike, 5 aspiratorë, si dhe u morën për ekspertim 123 bimë narkotike që ishin kultivuar në vazo. Gjithashtu, nga kontrolli përreth banesës, në një ambient tjetër të përshtatur për tharjen e bimëve narkotike, janë gjetur dhe dy mjete lundruese tip “Jet Ski”, pa dokumentacion.
Në vijim të operacionit, gjatë kontrollit të ushtruar në banesën e organizatorëve të kësaj veprimtarie kriminale, janë gjetën dhe një armë zjarri kallashnikov me 2 karikatorë me fishekë, 1 armë gjahu sportive, 2 automjete, tip “Range Rover” dhe tip “Benz”, prodhime të viteve të fundit.
Tre të arrestuarit akuzohen për veprat penale “Kultivimi i bimëve narkotike”, “Mbajtja pa leje dhe prodhimi i armëve, armëve shpërthyese dhe municionit” dhe “Vjedhja e energjisë elektrike”, të kryera në bashkëpunim.
Policia njofton se nga këqyrja e banesës është konstatuar dhe se kishte lidhje të paligjshme të energjisë elektrike, që shërbente për furnizimin e pajisjeve elektrike që përdoreshin për kultivimin e bimëve narkotike. Në vijim të operacionit u shoqëruan në ambientet e Policisë, kryetari i fshatit Trush i Poshtëm, shtetasi K. D., 38 vjeç, lexuesi i matësve elektrikë në zonë, shtetasi Z. N., 26 vjeç, si dhe elektricisti i zonës, shtetasi F. H., 29 vjeç, ndaj të cilëve u referuan materialet procedurale në Prokurori ku nisi procedimi në gjendje të lirë, për veprën penale “Shpërdorimi i detyrës”.
