Pesë persona janë arrestuar dhe dy të tjerë janë shpallur në kërkim në kuadër të operacionit antidrogë të koduar “Prioriteti” nga policia e Lezhës, që çoi në sekuestrimin e rreth 160 kg kanabis dhe zbulimin e 280 bimëve narkotike. Po ashtu, është sekuestruar një sasi parash.
Në pranga u vunë Mirash Pima, 29 vjeç, Kristian Pima, 29 vjeç dhe Florian Pima, 33 vjeç, vëllezër, të tre banues në fshatin Kaçinar, Mirditë; Eduart Çoku, 41 vjeç dhe Fatmir Ukaj (Tirtja), 24 vjeç, banues në Bulsharë, Mirditë.
Gjithashtu, u shpallën në kërkim Nikolin Ndoca, 31 vjeç, banues në fshatin Bulsharë, Mirditë dhe Kristian Mena, 21 vjeç, banues në Fan, Mirditë.
Po ashtu, nisi procedimi në gjendje të lirë për shtetasit Ndue Pima, 58 vjeç, banues në Kaçinar, Mirditë dhe Elion Tirtja, 36 vjeç, banues në Bulsharë, Mirditë.
Hetimet
Në një deklaratë për mediat, Drejtori i Drejtorisë Vendore të Policisë Lezhë Drejtues Alfred Elezi dha detaje rreth rastit. Ai tha se aksioni nga Drejtoria Vendore e Policisë Lezhë, erdhi pas një hetimi disajavor, në drejtimin e Prokurorisë pranë Gjykatës së Shkallës së Parë të Juridiksionit të Përgjithshëm Lezhë, të mbështetura edhe nga shërbimet e Forcës së Posaçme “Shqiponja” dhe të Komisariatit të Policisë Mirditë.
“Bazuar në provat e siguruara gjatë hetimit disajavor, është ushtruar kontroll në banesat e këtyre shtetasve, në fshatrat Bulsharë dhe Kaçinar, të rrethit Mirditë, ku janë gjetur dhe sekuestruar në cilësinë e provës materiale, 158 kilogramë lëndë e dyshuar narkotike cannabis sativa, një pjesë e gatshme për shitje dhe një pjesë në proces tharjeje. Gjithashtu, u asgjësuan 280 bimë të dyshuara narkotike cannabis sativa që ishin kultivuar në fshatin Bulsharë, Mirditë. Në vijim të veprimeve hetimore janë sekuestruar edhe 14 000 euro të dyshuara të përftuara nga kjo veprimtari kriminale, si dhe 15 celularë”, bëri me dije Elezi.
“Nga hetimet e thelluara për dokumentimin e plotë ligjor të përfshirjes së këtyre shtetasve në këtë veprimtari kriminale, dyshohet se ata janë autorë edhe të kultivimit të bimëve narkotike, në fshatin Planet, Mirditë, rast i evidentuar dhe i goditur nga strukturat e Policisë, më datë 12 tetor 2023”, shtoi ai.
“Tempulli”
Kryepolici i Lezhës njoftoi dy arrestime të reja në vijimin e operacionit “Tempulli” kundër shitjes së narkotikëve.
“Në qytetin e Laçit, shtetasi Alfons Marku, 34 vjeç, kishte përshtatur lokalin e tij, për përdorim dhe shitje të lëndëve narkotike. Gjatë kontrollit, Policia gjeti dhe sekuestroi një sasi dozash kanabisi.
Ndërsa ditën e djeshme, në Gjormë, u arrestua shtetasi Fatjon Gjoka, 29 vjeç, i cili kishte përshtatur lokalin për përdorim dhe shitje të lëndëve narkotike. Gjatë kontrollit, Policia gjeti dhe sekuestroi një sasi dozash të lëndës narkotike kokainë”, tha ai.
