Liderët e Bashkimit Europian dhe ata të Ballkanit Perëndimor realizuan foton familjare, pasi mbaruan sesionin e parë të punimeve për Samitin e Procesit të Berlinit.
Por, ndërkohë që të gjithë u mblodhën për të dalë në foto, e vetmja që mungoi ishte kryeministrja e Serbisë Ana Brnabiç, edhe pse aty ishin të pranishëm liderët më të fuqishëm të BE-së dhe vetë kancelari gjerman Olaf Scholz, vendi i të cilit ka iniciuar këtë nismë.
Brnabiç s’mori pjesë pasi fotoja u realizua me flamujt e vendeve pjesëmarrëse, mes tyre edhe flamuri i Kosovës dhe ky i fundit duket hapur se ka bezdisur kryeministren serbe.
Vlen të theksohet fakti se e njëjta gjë ndodhi dhe më 6 Tetor, ku për të njëjtën arsye, ministri i Jashtëm serb Ivica Daçiç nuk mori pjesë në foton familjare në ministerialin e Ministrave të Jashtëm të Ballkanit Perëndimor në Tiranë.
