Procesin e Kryeministri i Kosovës, Albin Kurti në fjalën e tij të mbajtur këtë të hënë në sesionin e parë të Samitit të Procesit të Berlinit në Tiranë,, theksoi domosdoshmërinë që akti i 24 shtatorit të ndëshkohet.
Ai tha se autorët e sulmit terrorist kundër Kosovës ku mbeti i vrarë edhe një efektiv policie, ende po qarkullojnë të lirë në Serbi dhe bëri përgjegjës Beogradin zyrtar për sulmin.
Ai shtoi se nga kontrollet e bëra janë konfiskuar 5 milionë euro armatim të sofistikuar dhe municione të prodhuara në Kragujevc dhe Çaçak ndërsa shtoi se në dy vitet e fundit, Serbia e ka çuar në kufirin me Kosovën katër herë ushtrinë e saj.
Sipas Kurtit, Kosova ende po kërcënohet me “invazion” nga Serbia.
“Është më vend që Samiti i Procesit të Berlinit, i themeluar për të rritur bashkëpunimin dhe për të krijuar marrëdhënie të mira fqinjësore mes shteteve të Ballkanit Perëndimor – po mbahet në Tiranë. Falënderoj kryeministrin Rama dhe kancelarin Scholz për organizimin e këtij samiti. Në një sulm terrorist kundër Kosovës më 24 shtator, një nga zyrtarët tanë policorë u vra, por autorët akoma enden të lirë në Serbi edhe pse publikisht e pranuan përfshirjen e tyre. Ky ishte një akt i ligë sponsorizuar nga Serbia, siç tregojnë provat e pakundërshtueshme. Ne kemi konfiskuar mbi 5 milionë euro armatim të sofistikuar dhe municione të prodhuara në Kragujevc dhe Çaçak. Katër herë në dy vitet e fundit Serbia ka sjellë ushtrinë e saj në kufirin tonë. Edhe njëzet e pesë vite pas fushatës gjenocidale, dhe pas kaq shumë raundeve të dialogut, Kosova ende kërcënohet me invazion nga Serbia. Ky moment na kërkon të reflektojmë dhe të mos e vazhdojmë punën si zakonisht. Një akt i tillë nuk duhet të kalojë pa u ndëshkuar”, tha Kurti.
