Rrugët e Shqipërisë janë përgjakur këtë të dielë (15 tetor). Dy viktima dhe 7 të plagosur është bilanci i tre aksidenteve të shënuara 12 orët e fundit në rrugët e vendit.
- Aksidenti me një të vdekur dhe dy të plagosur në aksin Kuçovë-Belsh
Gjatë natës, një 37-vjeçar humbi jetën në një aksident në aksin Kuçovë-Belsh. Ai po udhëtonte si pasagjer në këtë makinë që drejtohej nga një 22-vjeçar.
Në këtë pikë të rrugës, shoferi humbi kontrollin dhe u përplas me barrierat e anësore.
Përplasja ka qenë e fortë pasi mbrojtëset metalike kanë tejshkuar mes përmes makinën.
Shoferi dhe një 14-vjeçar që udhëtonte po ashtu si pasagjer morën lëndime pa rrezik për jetën.
- Aksidenti me një të vdekur në aksin Shkodër-Koplik
Në Malësi të Madhe, një 77-vjeçar u përplas për vdekje nga një makinë që drejtohej nga një 24-vjeçar, banues në Gostivar të Maqedonisë së Veriut. Ngjarja u shënua rreth orës 05:40 në aksin Shkodër – Koplik.
I moshuari sipas policisë po ecte në këmbë mori plagë të rënda të cilave nuk arriti tu mbijetojë. Drejtuesi i mjetit ndërkohë u ndalua nga Policia.
- Aksidenti me 5 të plagosur në aksin Levan-Tepelenë
5 anëtarë të një familje mbetën të plagosur pasi makina me të cilën udhëtonin përfundoi jashtë rrugës në aksin Levan-Tepelenë.
Të plagosurit u dërguan për ndihmë mjekësore ndërsa raportohet se të gjithë janë jashtë rrezikut për jetën.
Policia e Fierit nisi punën për sqarimin e shkaqeve të aksidentit që u shënua pranë fshatit Buzëmadh.
