Ushtria izraelite njoftoi se “i bën thirrje palestinezëve të largohen nga Rripi verior i Gazës deri në orën 20:00”.
Zëdhënësi i ushtrisë izraelite në gjuhën arabe, Avichay Adraee, tha se palestinezët kanë kohë deri në orën 20:00. për të lëvizur në jug të Rripit të Gazës, duke lënë të kuptohet se ushtria po përgatitet për një operacion masiv në Rripin verior të Gazës.
“Nëse jeni të shqetësuar për veten dhe të dashurit tuaj, duhet të shkoni në jug sipas udhëzimeve tona. Jini të sigurt se liderët e Hamasit janë të interesuar vetëm për të mbrojtur veten e tyre”, tha Adraee.
Forcat e Mbrojtjes së Izraelit (IDF) fillimisht njoftuan palestinezët në mesnatën e së premtes se kishin 24 orë për t’u larguar.
Qindra makina, motoçikleta dhe kamionë, të ngarkuar rëndë me sende, po shkojnë drejt Rripit jugor të Gazës. Njerëzit madje udhëtojnë me lopë, deve, dele dhe gomarë. Shumë familje morën rrugën e arratisjes në këmbë, duke ecur disa kilometra deri sa arritën në një vend të sigurt.
Sipas OKB-së, më shumë se 423,000 njerëz tani janë detyruar të largohen nga shtëpitë e tyre në Rripin e Gazës për shkak të bombardimeve të Izraelit ndaj enklavës palestineze.
Në një lëvizje të interpretuar nga shumë njerëz si ngushtim i kufijve për fillimin e ofensivës tokësore të Izraelit në Gaza, ushtria izraelite bëri thirrje në një deklaratë për evakuimin e të gjithë civilëve nga qyteti në jug.
Në fakt, ushtria izraelite hodhi mijëra fletëpalosje në Gaza për të paralajmëruar banorët që të largoheshin.
“Evakuoni menjëherë shtëpitë tuaja dhe shkoni në jug të Wadi Gazës”, lexonin në arabisht fletëpalosjet e hedhura nga droni. Në një hartë të përfshirë në fletëpalosje ka një shigjetë që tregon në jug, poshtë një vije të tërhequr në qendër të Rripit të Gazës.
Reagimi erdhi fillimisht nga OKB-ja pasi tha se ishte “e pamundur” për palestinezët të ndiqnin paralajmërimin e evakuimit të Izraelit brenda 24 orëve të ardhshme.
Në veçanti, përfaqësuesi i OKB-së, Stéphane Dujarric, tha në një deklaratë se urdhri për evakuimin e 1.1 milion njerëzve është i pamundur pa pasoja katastrofike humanitare.
Hamasi u bën thirrje civilëve të qëndrojnë në shtëpitë e tyre
Reagimi i Hamasit ndaj urdhrit të evakuimit ishte i menjëhershëm, duke u bërë thirrje palestinezëve të qëndrojnë në shtëpitë e tyre.
“Qëndroni në shtëpitë tuaja dhe jini të palëkundur përballë kësaj lufte të pështirë psikologjike të bërë nga pushteti okupues”, tha ai.
Raportet flasin për një përpjekje të Hamasit për të parandaluar evakuimin e Gazës.Militantët e Hamasit veprojnë në zona civile dhe Izraeli i ka akuzuar prej kohësh se i përdorin palestinezët si mburoja njerëzore.
Pra, thonë analistët, një evakuim masiv i civilëve, nëse kryhet, do t’i linte luftëtarët e tyre më të ekspozuar se kurrë më parë.
