Policia e Tiranës konfirmoi këtë të premte arrestimin e Emiljano Ninës, kushëri i Ervis Martinajt, për aksidentin e ndodhur te diga e liqenit artifilial dy muaj më parë.
I riu në kërkim u vu në pranga mbrëmjen e djeshme në rrugën “5 Maji” nga efektivët e komisariatit 4 në kuadët të aksionit të koduar “Escape” që erdhi “bazuar në të dhënat për vendndodhjen e një shtetasi në kërkim”, njoftoi policia.
Nina, 28 vjeç, në muajin gusht të këtij viti, përplasi automjetin që drejtonte me bordurën anësore te Liqeni Artificial dhe më pas u largua.
Ai rezultonte i shpallur në kërkim edhe për dhunë në familje, pasi është dënuar me 8 muaj burgim për këtë vepër penale.
“Ky shtetas, në muajin gusht të këtij viti, duke drejtuar një automjet tip ‘BMW’, për shkak të shpejtësisë shumë të lartë, ka humbur kontrollin dhe për pasojë automjeti ka dalë nga rruga dhe është përplasur me bordurën anësore te Liqeni Artificial. Pas aksidentit, ky shtetas është larguar menjëherë nga vendi i ngjarjes. Gjithashtu, ky shtetas ka qenë i shpallur në kërkim për veprën penale ‘Dhuna në familje’, pasi Gjykata e Shkallës së Parë e Juridiksionit të Përgjithshëm Tiranë e ka dënuar me 8 muaj burgim, për këtë vepër penale”, njoftoi policia.
Fshehja e shoferit
Për aksidentin, policia ka arrestuar më herët pronarin e makinës BMW Eldi Allushi për akuzat: “Moskllëzim krimi”, “Veprime që pengojnë zbulimin e së vërtetës” dhe “Përkrahja e autorit të krimit”. Ky i fundit nuk ka treguar në dëshmitë e para se ka qenë Nina nën drejtimin e automjetit të aksidentuar, por ka pretenduar se ishte vetë shoferi. Në mjet në momentin e aksidentit, ishte edhe Jurgen Allushi, kushëriri i pronarit të makinës i referuar në gjendje të lirë nga policia për akuzat veprime që pengojnë zbulimin e të vërtetës, përkrahje të autorit të krimit, dhe moskallëzimit të krimit. Edhe ai fillimisht është treguar ngurues për të treguar se kish ishte personi që drejtonte mjetin e aksidentuar mëngjesin e 22 gushtit.
Eldi Allushi, gjatë dëshmisë më pas, është justifikuar për arsyet që e shtynë të gënjejë duke thënë se ai ishte shoferi, kur në fakt ndodhej në banesë. 26-vjeçari është shprehur para hetuesve se dha dëshmi të rreme për të mbrojtur shokun e tij, të cilit i kishte dhënë në përdorim automjetin. I riu nga Durrësi u ka treguar efektivëve se Emiljano Nina, shkoi në shtëpinë e tij për të fjetur, pa i treguar se kishte shkaktuar aksident te liqeni artificial.
“Nuk i tregova policisë se nuk doja t’i bëja keq Emilianos. Ai ma kërkoi makinën dy herë për të marrë një shoqe dhe unë ia dhashë. Emiliano pasi erdhi nga aksidenti fjeti gjumë, mua s’më tregoi për përplasjen që kishte bërë me makinë.”
Eldi Allushi tha gjithashtu se një oficer policie e ka marrë në telefon duke i kërkuar të paraqitet në komisariat lidhur me aksidentin. Gjatë bisedës në telefon, i ka thënë oficerit se aksidentin e kishte bërë ai dhe para përplasjes kishte pirë një cigare hashash.
“Më mori në telefon një oficer policie dhe i thashë që do paraqitem vetë në polici. Për 5 orë nuk u paraqita në polici pasi kisha frikë. Automjetin ma bëri dhuratë xhaxhai im disa kohë më parë.”
Kushëriri i Eldi Allushit, Jurgen Allushi, i cili ndodhej pasagjer në mjet deklaroi se para aksidentit kishte konsumuar një ujë, ndërsa shoferi Emiljano Nina tre birra.
Lidhur me aksidentin, Nina akuzohet për 7 vepra penale, “Shkelja e rregullave të qarkullimit rrugor”, “Drejtimi i automjetit në mënyrë të parregullt”, “Largimi nga vendi i aksidentit”, “Shkatërrimi i pronës”, “Moskallëzimi i krimit”, “Veprime që pengojnë zbulimin e së vërtetës” dhe “Prodhimi, mbajtja, blerja apo shitja pa leje e armëve të ftohta”. Akuza e fundit lidhet me një shkop bejsbolli që është gjetur në banesën e tij gjatë një kontrolli policor pas aksidentit.
27-vjeçari Nina është person me precedentë kriminalë, i dyshuar dhe si i përfshirë në vrasjen e Enton Nikës, ngjarje e ndodhur në Linzë, më 11 nëntor të vitit 2015. Në vitin 2018 ai u arrestua nga policia e Vlorës, pasi siç u raportua në atë kohë, qëlloi me armë duke terrorizuar turistët në lokalin e njohur “Havana” në Dhërmi. Po ashtu, rezulton i skeduar dhe i arrestuar për të tjera ngjarje kriminale.
