Ministri i Energjisë i Izraelit, Israel Katz është shprehur i prerë se rrethimi i Gazës nuk do të përfundojë derisa të lirohen pengjet izraelite.
Përmes një postimi në platformën “X”, Katz tha se nuk do të ketë energji elektrike, ujë dhe gazë për palestinezët deri sa mbahen pengje qytetarët izraelitë.
“Ndihma humanitare për Gazën? Asnjë çelës elektrik nuk do të aktivizohet, asnjë hidrant uji nuk do të hapet dhe asnjë kamion me karburant nuk do të hyjë derisa të rrëmbyerit izraelitë të kthehen në shtëpi. Humanizëm për humanizëm. Askush mos të na predikojë moral”, shkruan ai.
Izraeli ndaloi furnizimet për Rripin e Gazës pas sulmeve të së shtunës të Hamasit. Kujtojmë se militantët e Hamasit kanë nis një sulm të papritur në Izrael duke shkaktuar viktima të shumta. Ndërkohë Izraeli po përgatitet që të nis një sulm tokësor për të rimarrë kontrollin e Gazës.
Deri më tani, numri i të vdekurve në Izrael mësohet se ka arritur në 1200, ndërsa më shumë se 1100 njerëz janë vrarë nga sulmet ajrore izraelite në Gaza.
