Shqipëria luan një ndeshje të madhe sonte në “Air Albania”, ku një trepikësh ndaj Çekisë do ta bënte thuajse të sigurt pjesëmarrjen në Europianin e 2024-ës në Gjermani.
Në “News 24” në “Sport News”, ish-lojtari dhe trajneri i kuqezinjve, Sulejman Mema, u shpreh besimplotë për ndeshjen e sotme.
Mema tha se llogaritë bëhen në nëntor dhe gjasat janë të mëdha për t’u kualifikuar. Ai beson që Çekia do të thyhet sonte për herë të parë në grup.
Çfarë pret nga kjo sfidë Mema dhe a është ky testi final, më i rëndësishmi për të kuptuar forcën dhe pjekurinë e këtij brezi, këtij grupi?
Ky brez ka avantazh, pasi lojtarët luajnë në klube të mira. Shqiptarët e kanë patur nostalgji për të parë Serie A. Mos harrojmë që me Poloninë kemi patur në fushë 7 lojtarë të Serie A.
Në shifra, në rast suksesi kundër Çekisë, mund të kualifikohemi si të parët në grup, madje ish-trajneri De Biasi beson fort në këtë pjesë. A është e mundur, apo e shton presionin kjo pritshmëri kaq e madhe ndaj këtij ekipi?
Unë besoj që jo. Stafi është profesionist. Llogaritë i kemi bërë gjatë gjithë kohës. Është ndeshje e vështirë sot, duke u nisur nga cilësitë e lojtarit.
Ndryshe nga ndeshjet e shtatorit, këtë herë kuqezinjtë vijnë pak më të ngarkuar fizikisht, me disa dëmtime, jo në top formë. A mund të ndikojnë këto detaje kundër një ekipi shumë fizik, që nuk ka pësuar asnjë humbje?
Shpresojmë që të humbasë këtu te ne (Qesh). Ka lojtarë që nuk luajnë mirë me skuadrat e tyre, por shpresoj që të japin maksimumin këtu.
Profesor, ke ndonjë preferencë, ndonjë ndjesi, kush mund ta bëjë diferencën në këtë sfidë?
Unë kam besim te sulmuesit. Inteligjenca e Muçit mund të bëjë diçka ndryshe. Ato pak herë që kemi dalë në sulm, kemi goditur. Bajrami ka mençurinë e duhur, ka aftësinë që është mirë fizikisht dhe godet me të dyja këmbët.
Në këto kualifikuese kemi sulmin më të mirë, a do ta luaj Silvinjo në sulm në këtë sfidë, të shtyrë nga tifozët, apo duhet të bëjmë llogari, fundja dhe një barazim do ishte rezultat shumë pozitiv…
Ky staf punon me detaje që do të vlejnë. Kur duhet të sulmojë ekipi, e di trajneri dhe do të aktivizojë të tjerë futbollistë. Pres Shqipëri racionale.
Sa peshë ka tradita në këto përballje, a i druheni një “deja vu” me atë që ndodhi kundër Polonisë pikërisht në “Air Albania”, ku ishim shumë pranë “play off”-it të Botërorit, apo është një histori tjetër me të tjerë aktorë…
Duhen harruar disa gjëra. Këtu janë të diagnostikuar të gjithë futbollistët. Kundërshtari është mjaft i fortë fizikisht.
Profesor, i bëra Starovës një pyetje pak ditë më parë, por nuk mora një përgjigje, shpresoj ta marrë tani. Është pyetja që bëhet më shumë në rrjetet sociale. Cili do të ishte tredhëmbëshi sulmues ideal në sytë tuaj, në shijen tënde?
Unë e kam atë përgjigje por nuk e them dot para ndeshjes.
Më jep një dëshirë apo një parashikim logjik, si del kjo sfidë?
Nuk duhet të humbasim. Janë të tria rezultatet. Po mos të humbasim, llogaritë bëhen me të lehta.
