Dy prokurorë kanë aplikuar deri më tani për 3 vendet vakante në Prokurorinë e Posaçme.
Ata janë prokurorët Albert Kuliçi dhe Ols Dado.
Prokurori Albert Kuliçi ka filluar punë në vitin 2010 dhe punon prej vitesh në prokurorinë e Vlorës. Në dhjetor 2019, makina që ai përdorte u hodh në erë me eksploziv. Atentati u konsiderua nga Këshilli i Lartë i Prokurorisë si sulm për shkak të funksionit.
Ols Dado ka punuar në sektorin privat dhe si noter, përpara se të emërohej prokuror në Prokurorinë e Pogradecit në vitin 2008. Në vitin 2010 ai u transferua në Prokurorinë e Rrethit Gjyqësor Tiranë, ndërsa prej vitit 2020 është komanduar në Prokurorinë e Përgjithshme si ndihmës magjistrat.
Muajin e kaluar, komisioni i Zhvillimit të Karrierës në Këshillin e Lartë të Prokurorisë ka propozuar hapjen e garës për plotësimin e tre vendeve vakante në SPAK, që pritet ta çojë numrin e prokurorëve në 20 pranë kësaj prokurorie.
