Drejtuesi teknik i një firme është vënë në prangat e policisë së Tiranës këtë të enjte. 66-vjeçari u arrestua pasi një ditë më parë një punonjës 42-vjeçar ra nga lartësia teksa punonte në një objekt në Lundër. Shkak sipas policisë dyshohet se u bë mungesa e sigurimit teknik në punë.
“Specialistët për Hetimin e Krimeve të Komisariatit të Policisë Nr. 1 arrestuan shtetasin A. B., 66 vjeç, banues në Tiranë, me detyrë drejtues teknik në një firmë, pasi ditën e djeshme, në Lundër, dyshohet se për shkak së mungesës së sigurimit teknik në punë, ka rënë nga lartësia e objektit ku ishte duke punuar, shtetasi A. M., 42 vjeç, banues në fshatin Ibë. Si pasojë e plagëve të marra, 42-vjeçari ka humbur jetën në spital”, thuhet në një njoftim të policisë.
